Сака "Арсенал"нинг "Сити"га қарши ҳимоявий ўйнаши ҳақида: Бунга аҳамият бермайман

"Арсенал" вингери Букайо Сака "Манчестер Сити"га қарши ўйинларда "канонирлар"нинг ҳаддан ташқари ҳимоявий ўйнагани учун қилинган танқидларга жавоб берди. Эслатиб ўтамиз, бугун, 22 сентябрь куни Лондон клуби Англия чемпионатининг 5-тури доирасида сафарда “Сити” меҳмони бўлади.

“Тўғрисини айтсам, мен бунга аҳамият бермайман. Жамоамиз нимага ишонишини ва нимага эришмоқчи эканлигини билади. Ҳақиқий сабабларни фақат биз биламиз. Охирги сафар биз “Этиҳад”гаа (“Манчестер Сити”нинг уй стадиони) ғалаба учун борган эдик, бугун ҳам буни яна такрорлаймиз”, - дея Саканинг сўзларини келтиради Goal.

Маълумот учун, ушбу жамоаларнинг АПЛ доирасидаги “Этиҳад”да кечган сўнгги учрашуви 0:0 ҳисобида якунланган. Бу ўтган мавсумнинг 30-турида содир бўлган эди.

Айни дамда "Манчестер Сити" АПЛ мусобақа жадвалида 12 очко билан 2-ўринда бормоқда. Ҳисобида 10 очко бўлган "Арсенал" эса 5-ўриндан жой олган.