Роналдунинг дубльи Пирс Морганга 5 минг фунт олиб келди
- 25-июн, 03:35
- Bilolbek Imomov
- 0
- Футбол
Португалия терма жамоаси ҳужумчиси Криштиану Роналдунинг Ўзбекистонга қарши баҳсдаги дубльи британ журналисти Пирс Морганга 5 минг фунт стерлинг ютиб олиш имконини берди.
Морган радиобошловчи ва актёр Рори Женнингс билан баҳслашган эди. Женнингс 41 ёшли Роналду 2026 йилги Жаҳон чемпионатида бирорта ҳам гол уролмайди деб ҳисоблаган.
Бироқ португалиялик юлдуз Ўзбекистонга қарши учрашувда икки бор рақиб дарвозасини ишғол қилди ва Португалиянинг 5:0 ҳисобидаги йирик ғалабасига ҳисса қўшди.
Шу тариқа, Роналду Жаҳон чемпионатлари ва Европа чемпионатларидаги 10 ўйинлик голсиз сериясига ҳам барҳам берди.
Бундан ташқари, у Португалия терма жамоаси тарихида Жаҳон чемпионатларида энг кўп гол урган футболчига айланди. Ҳозирда унинг ҳисобида мундиалларда 10 та гол мавжуд.
Пирс Морган эса ютган 5 минг фунтни ҳарбий хизмат вақтида ҳалок бўлган аскарларнинг фарзандларига ёрдам кўрсатувчи хайрия жамғармасига ўтказишини маълум қилди.