Роналдуни ўйин вақти мазаси қочди

Жаҳон футболида энг кўп гол урган Криштиану Роналду Саудия Арабистони чемпионати 29-турида “Ан-Наср”нинг “Ал-Иттифоқ” жамоасига қарши кечган учрашувининг 89-дақиқасида захирага олинган эди.

Роналду 1:0 ҳисобидаги ғалабани нишонлаш жараёнида ҳам кўриниш бермади.

Жамоа бош мураббийи Жорже Жезуш бу вазиятга ойдинлик киритди.

- Танаффусдан кейин Криштиану умуман майдонга чиқмаслиги керак эди, унинг қорнида муаммо бор эди, кайфияти ҳам ёмон эди. Уни алмаштирганимда, Роналду дарҳол кийиниш хонасига йўл олди ва у ерда қайт қилди.

Футболда қанча тажрибага эга бўлишимиздан қатъи назар, ўйинчининг эмоционал ҳолати ҳам катта аҳамиятга эга.

Биз маррага тобора яқинлашиб бораётганимизни ҳис қиляпмиз. Шунинг учун ҳам у ўйин охирида жамоа билан бирга эмас эди, Криштиану ўзини жуда ёмон ҳис қилаётгани боис кийиниш хонасида қолди, - деди Жезуш Record нашрига.