Роналдудан зўр футболчи чиқди

Саудия Арабистони Профессонал лигаси Криштиану Роналдуни эътиборсиз қолдириб, энг яхши футболчи совринини Жоау Феликсга берди.

Криштиану Роналду “Ан-Наср”ни олти йиллик танаффусдан кейин  Саудия Арабистони  чемпионлигига олиб келди, аммо мавсумнинг энг яхши футболчиси соврини унинг жамоадоши Жоау Феликсга топширилди.

41 ёшли португалиялик юлдуз яна бир бор ушбу индивидуал мукофотни қўлга кирита олмади.

 Саудия Арабистони чемпионатидаги 18 клуб сардорлари ва бош мураббийлари ўртасида ўтказилган сўровномада овозларининг катта қисми “Челси”нинг собиқ футболчисига берилди. Овоз беришда ОАВ вакиллари ҳамда мухлислар ҳам иштирок этган.

Сўнгги турда Роналду “Дамак” дарвозасига иккита тўп киритиб, чемпионатдаги умумий голлари ҳисобини 28 тага етказди. Феликс ушбу учрашувда Садио Манега голли узатма берди. Бу унинг мавсумдаги 13-ассисти бўлди ва лигада ҳеч бир футболчи бундан кўпроқ голли пас бермаган.

“Челси”дан кўчиб ўтганидан кейинги дебют мавсумида португалиялик ҳужумчи 20 та гол урди.

“Олтин бутса”ни сўнгги турда хет-трик қайд этган Хулиан Киньонес қўлга киритди, унинг голлари сони 33 тани ташкил қилди. Иван Тони ҳисобидаги голлар сони битта кам бўлиб қолди, “Ал-Аҳли”нинг ҳал қилувчи ўйинида гол уролмагани учун тўпурарлар пойгасида иккинчи ўринга тушиб қолди.

Гол ва ассистлар жамланмаси бўйича Феликс Роналдудан устун келди –33 тага қарши 30 та. 41 ёшли Роналду мавсум давомида атиги икки марта голли узатма берди.

Статистикадан ташқари, Жоау Феликс икки марта – сентябрь ва май ойларида “Ой футболчиси” мукофотини олган ягона футболчига айланди.

Роналду эса бу мавсумда бирор марта ҳам ойнинг энг яхши футболчиси бўла олмади. Унинг охирги бундай соврини 2024 йил май ойида, лигадаги биринчи тўлиқ мавсумида қўлга киритилган бешинчи мукофоти бўлган. Бироқ ўша мавсум якунларига кўра лига “Мавсум футболчиси” умумий мукофотини топширмаган, ўтган йили эса ушбу соврин Карим Бенземага берилган.

Шу тариқа, Роналду ҳалигача бирор марта ҳам Саудия Про-лигасининг мавсум энг яхши футболчиси, деб топилмаган. Айни пайтда Жоау Феликс ушбу мавсумда тўққиз марта ўйиннинг энг яхши футболчиси сифатида эътироф этилди.