Роналду устози Саудия Арабистони чемпионатининг энг яхши мураббийи деб топилди
- 23-май, 11:42
- Bilolbek Imomov
- 0
- Футбол
“Ан-Наср” бош мураббийи Жорже Жезуш ўтган мавсум якунларига кўра, Саудия Арабистони чемпионатининг энг яхши мураббийи сифатида эътироф этилди.
Португалиялик мутахассис қўл остида “Ан-Наср” 2019 йилдан кейин илк бор мамлакат чемпионлигини қўлга киритди.
Эр-Риёд клуби мавсум давомида энг кўп ғалаба қозонган жамоага айланди — 28 та. Шунингдек, жамоа кетма-кет 16 та ғалабали серия қайд этиб, чемпионатда энг кўп гол урган клуб бўлди — 91 та гол. Тўплар фарқи ҳам энг яхши кўрсаткич бўлди — +63.
“Ан-Наср” шунингдек, “Ал-Аҳли” билан биргаликда энг кўп қуруқ ўйин ўтказган жамоа сифатида қайд этилди — 17 та.
Мавсумнинг энг яхши тўпурари эса “Ал-Қадисия” ҳужумчиси Хулиан Киньонес бўлди. У 33 та гол уриб, “Ал-Аҳли” форварди Айвен Тоунини бир голга ортда қолдирди.
Аввалги икки мавсумда “Олтин бутса” соҳибига айланган Криштиану Роналду бу сафар 28 та гол билан чекланди.
“Олтин қўлқоп” соврини “Ал-Аҳли” посбони Эдуар Мендига насиб этди. У “Ал-Ҳилол” дарвозабони Яссин Буну билан бир хил — 14 та қуруқ ўйин қайд этган бўлса-да, камроқ гол ўтказиб юборгани сабабли ғолиб деб топилди — 18 га қарши 20.