Роналду ўзига ўта кучли янги лигани танлади
- 14-феврал, 07:14
- Zohir Toshxo’jayev
- 0
- Футбол
Португалия терма жамоаси етакчиси Криштиану Роналдунинг Саудия Арабистонидаги келажаги ҳали ҳам ноаниқлигича қолмоқда. Жаҳон футболида энг кўп тўп киритган футболчи “Ан-Наср”ни тарк этишга тайёргарлик кўряпти.
Роналдунинг келажагига оид охирги хабарларда “Ан-Наср” 41 ёшли футболчини 40 миллион фунтга сотиб юборишга тайёргарлиги, Англия Премьер-лигасининг бир неча клублари бу таклифни қабул қилмагани, “Спортинг” ўз тарбияланувчисини кутаётгани, шайхлар Криштиануга жамоа қидиришни давом эттираётгани маълум қилинган эди.
Янги маълумотларда Роналдунинг позицияси ҳам тилга олинмоқда. Британия оммавий ахборот воситаларининг ёзишича, машҳур юлдузнинг ўзи “Спортинг”дан аниқ чорлов бўлганига қарамай, ҳозирча Англия Премьер-лигасига бир йиллик қайтиш вариантини устувор деб ҳисобламоқда. Маълум қилинишича, португалиялик форвард аниқ келишувлар мавжуд бўлмаса-да, яна Англия чемпионатида ўйнаш имкониятини кўриб чиқяпти.
Шу билан бир вақтда, Саудиянинг “Ан-Наср” клуби футболчининг юқори маоши фонида у билан хайрлашиш вариантларини фаол ўрганмоқда.
Криштиану Роналду 2022 йилнинг 30 декабрида эркин агент сифатида “Ан-Наср”га расман ўтган эди. 2025 йилнинг июнида унинг шартномаси 2027 йил ярмигача узайтирилди.