Роналду икки юлдузнинг бир ўйинда ўрнатган рекордини биттада йўққа чиқарди
- 9-июн 2025, 08:51
- Zohir Toshxo’jayev
- 0
- Футбол
Криштиану Роналду етакчилигидаги Португалия терма жамоаси УЕФА Миллатлар лигаси финалида Европанинг амалдаги чемпиони Испания футболчиларини мағлуб этиб, бош соврин соҳиби бўлди.
Испанлар ўйин давомида икки марта ҳисобда олдинда борган бўлса-да, португалияликлар баҳсни дуранг билан якунлашга муваффақ бўлди. Қўшимча таймларда 2:2 ҳисоби ўзгармагач, ғолиб пенальтилар сериясидан аниқланди.
Унда Португалия терма жамоаси 5:3 ҳисобида зафар қучди.
Криштиану Роналду Миллатлар лигаси финалида иштирок этган энг ёши катта футболчи сифатида рекорд ўрнатди. Ўйин ўтказилган куни тўпурар 40 ёшу 203 кунлик эди. Бу кўрсаткич янги рекорд сифатида қайд этилди.
Аввалги рекорд 2023 йили Хорватия ва Испания терма жамоалари ўртасидаги беллашувда қайд этилган. Ўша баҳсда қатнашган Лука Модрич 37 ёшу 282 кунлик, Хесус Навас эса 37 ёшу 209 кунлик бўлиб, турнир тарихидаги энг ёши катта ўйинчилар сифатида рекордчи бўлганди.
Энди бу рекорд ҳам Криштиану Роналду ҳисобига ёзилди.