“Рома”нинг Шомуродов бўйича қарори ўзгарди!
- 22-феврал 2025, 08:20
- Zohir Toshxo’jayev
- 1
- Футбол
“Рома” Европа лигасининг плей-офф босқичи ўтиш ўйинида кучли рақиб – “Порту”ни ортда қолдириб, кейинги босқичга чиқди ва бош соврин учун асосий даъвогарлар қаторида эътироф этилмоқда.
“Порту” билан бўлган баҳс Клаудио Раньери учун алоҳида аҳамият касб этди. 73 ёшли мураббий Европа миқёсида 21 йилдан бери эндигина плей-офф босқичида муваффақиятга эришди.
Италия матбуотининг ёзишича, “Порту”нинг таслим этилишида Пауло Дибалага гол уриб, ўйинда бурилиш ясаш имконини яратиб берган Элдор Шомуродовнинг ҳиссаси катта бўлди.
- Элдор Шомуродов жорий мавсумнинг ўзида икки маротаба бошқа клубларга кетишга жуда яқин эди. Уни ёзги трансферлар ойнасининг сўнгги кунларида АҚШга – “Аталанта Юнайтед” клубига, январда эса, Италиянинг бошқа жамоаларига бериб юбормоқчи бўлишганди.
Хусусан, А Серияда қолиш учун курашаётган “Венеция” бош мураббийи Эусебио Де Франческо Элдорга шахсан боғланиб, жамоасига таклиф қилган ва унинг келишини кутаётганди.
Ўзбек ҳужумчиси мавсум бошида “Эмполи” ва январда “Айнтрахт”га қарши учрашувларда муҳим роль ўйнаганидан кейин “Рома” уни олиб қолди.
Шомуродов ўзига имкон берилган беллашувларда жамоанинг муҳим бўлагига айлана олишини намойиш қилмоқда. Элдор трансферга қўйилган ўйинчидан “бўрилар”нинг қаҳрамонига айланиб боряпти, - деб ёзмоқда Corriere dello Sport газетаси.
Қизиғи шундаки, Шомуродов ўтган йили ёзда “Кальяри”даги ижарадан қайтганидан кейин уни клубдан кетишини таъминлаш учун бош қотириб келган спорт директори Флоран Гисольфининг легионеримиз ҳақидаги фикри, позицияси ва қарори ўзгарди.
Маълумки, “Рома”нинг асосий ҳужумчиси Артём Довбик жароҳати туфайли жамоага ёрдам бера олмаяпти. Флоран Гисольфи украиналик футболчи аҳволи ҳақида гапириб, унинг ўрнини Элдор Шомуродов тўлиқ боса олишини таъкидлади.
- Довбикнинг жароҳати қанчалар жиддий эканини ҳали аниқ билмаймиз. Лекин вазият у қажар жиддий эмаслигига умид қилиб турибмиз. Артём шикастланган, лекин бизда Элдор Шомуродов бор ва у майдонда Довбикнинг ўрнини боса олади.
Шомуродов жамоага ёрдам беришга тайёр, чунки у ҳар доим ўзини ишга 100 фоиз бағишлайди, - деди спорт директори Флоран Гисольфи.
Олдинда “Рома”ни А Серияда “Монца”га қарши муҳим баҳс кутиб турибди. Бўлажак беллашувда Элдор Шомуродов бошланғич таркибда майдонга тушиши кутилмоқда.
26-турдан ўрин олган ушбу учрашувда “Олимпико” аренаси мезбонлик қилади. Ўйин 24 февралдан 25 февралга ўтар кечаси Тошкент вақти билан соат 00:45 да бошланади.
Эслатиб ўтамиз, жорий мавсумда Элдор Шомуродов А Серия, Италия кубоги ва Европа лигасида 22 маротаба майдонга тушиб, ўз ҳисобига учта гол ва иккита ассист ёздириб қўйди.