Роберт Левандовски: "Мен ҳозир қаерда эканлигимни қадрлайман ва бу менга ёқади"

"Барселона" клуби ҳужумчиси Роберт Левандовски ўз келажаги ҳақида гапирди.

“Ёшим деярли 38 да, лекин жисмонан ўзимни яхши ҳис қиляпман, шунинг учун турли вариантларни кўриб чиқяпман. Мен нафақат ўйнаш, балки ҳаётдан завқланиш вақти келганини ҳисобга олишим керак. Қуйи даражадаги лигаларми? Эҳтимол, шундай вариант пайдо бўлади ва мен буни истисно қилмайман. Шартномам тугашига тахминан 50 кун қолди, шунинг учун қарор қабул қилиш учун ҳали вақт етарли. Мен бир нечта таклифларни эшитиб, кейин қарор қабул қиламан.

Мен ҳозир қаерда эканлигимни қадрлайман ва бу менга ёқади. Кейин нима бўлишини кўрамиз, лекин бир нарсани аниқ айта оламан: мен карьерамни давом эттирмоқчиман," - деди полшалик ҳужумчи AS нашрига берган интервьюсида.

Эслатиб ўтамиз, Левандовски жорий мавсумда "Барселона" билан Испания чемпионлигини қўлга киритган эди. Унинг клуб билан амалдаги шартномаси 30 июнда якунига етади.

Азизжон Абдувалиев