Рикельме: "Президент бўлсам, Xоланд ва Родри "Реал"да ўйнайди"

"Реал" президентлигига номзод Энрике Рикельме Эрлинг Xоланднинг эҳтимолий трансфери ҳақида фикр билдирди ва бу ҳолатни 2000 йилдаги Луиш Фигу трансфери билан таққослади.

"Xоландни мендан кўра, кўпроқ "Реал"нинг ўзи ишонтира олади. Дунёнинг энг яхши футболчилари, агар шароит мос келса, шу ерда ўйнашни истайди. "Реал" катта клублар билан рақобат қилади, аммо ҳеч қайси клуб Мадридники каби тарихга эга эмас", — деди Рикельме.

У Xоланднинг отаси ва агенти томонидан тарқалган раддияларга ҳам муносабат билдирди.

"Бу ўйиннинг бир қисми. Фигу билан ҳам худди шундай бўлган эди. Биз футболчини ҳимоя қилишимиз керак. Бу масалани аввал ҳам, кейин ҳам муҳокама қилдик. Шунингдек, Родрининг агенти билан ҳам мулоқот қилдик", — деди у.

Рикельме Родри трансфери Xоландникидан фарқ қилишини таъкидлади.

"Родри бўйича биз "Манчестер Сити" билан музокара олиб боришимизга тўғри келади. Биз клубга катта ҳурмат билан қараймиз ва бу устида ишлаймиз. Мен бир нарсани аниқ биламан: агар президент бўлсам, бу икки футболчи "Реал"да ўйнайди", — деди номзод.

Шунингдек, у эфирда "Реал" либосида Xоланд исми туширилган футболка кўрсатилгани ҳақидаги саволга ҳам жавоб қайтарди.

"Бу кўнгилочар дастур. Футбол — бу футбол, бу ҳам ўйиннинг бир қисми. Биз "Манчестер Сити"га ҳурмат билан муносабатдамиз ва музокараларни давом эттирамиз. Ҳатто тил билан боғлиқ тушунмовчиликлар юзага келмаслиги учун чоршанба куниёқ клуб билан алоқага чиққанмиз", — деди Рикельме.