Икки карра жаҳон чемпиони Шерика Жексон Хитойнинг Сямэнь шаҳрида енгил атлетика бўйича ўтказилган Diamond League босқичида аёллар ўртасидаги 200 метрга югуриш баҳсида ишончли ғалабага эришди.
Ямайкалик спортчи 21,87 сония натижа қайд этиб, мусобақа рекордини янгилади. Шунингдек, у жаҳоннинг энг яхши мавсумий натижасидан атиги 0,01 сонияга ортда қолди.
Жексон стартданоқ пешқадамликни қўлга олди ва масофанинг бурилиш қисмида устунлигини янада ошириб, рақибаларини ортда қолдирди.
Шона Миллер-Уйбо 22,04 сония натижа билан иккинчи, Анавиа Баттл эса 22,29 сония билан учинчи ўринни эгаллади. Ҳар икки спортчи ўзининг мавсумдаги энг яхши натижасини кўрсатган бўлса-да, Жексонга жиддий рақобат кўрсата олмади.
2023 йилги жаҳон чемпиони Ша’Карри Ричардсон ҳам мавсумдаги энг яхши натижасини қайд этиб, 22,38 сония билан тўртинчи бўлди.
Буюк Британия вакили, жаҳон чемпионати кумуш медали соҳиби Эми Ҳант эса тўққиз нафар иштирокчи орасида еттинчи ўринни эгаллади.
Сямэньдаги мусобақанинг яна бир энг ёрқин воқеаси найза улоқтириш баҳсида кузатилди.
Хитойлик 18 ёшли спортчи Ян Зийи 71,74 метр натижа қайд этиб, аёллар найза улоқтириши тарихидаги энг яхши иккинчи натижа муаллифига айланди.
Ян 17 ёшидаёқ ўсмирлар ўртасида жаҳон рекордини ўрнатган эди. 18 ёшга тўлганидан бир кун ўтиб эса у Diamond League рекорди, Осиё рекорди ва 20 ёшгача бўлган спортчилар ўртасидаги жаҳон рекордини янгилади.