“Реал”даги жанжал маълумотларини сиздирган футболчи топилди

Испания оммавий ахборот воситалари хабарига кўра, клуб ичидаги махфий маълумотларни журналистларга етказганликда ярим ҳимоячи Даниэль Себальос гумон қилинмоқда.

Манбада айтилишича, у Орельен Тчуамени ва Федерико Вальверде ўртасидаги можаро тафсилотларини оммавий ахборот воситаларига етказган.

Шов-шувли воқеа 2026 йил май ойида “Реал”нинг машғулот базасида содир бўлган. Хабарларга кўра, икки футболчи ўртасида икки марта жанжал чиққан ва охирги тўқнашув кийиниш хонасида муштлашувга айланган.

Ҳодисалардан бири вақтида Вальверде йиқилиб, бошини столга уриб олган. Натижада у бош-мия жароҳати ва ёриқлар туфайли шифохонага олиб кетилган, шифокорлар унга чок қўйишга мажбур бўлган.

Шундан кейин клуб президенти Флорентино Перес фавқулодда йиғилиш ўтказган. Икки футболчи ҳам 500 минг евро миқдорида жаримага тортилган. Клуб интизомий иш очган бўлса-да, жазо молиявий санкциялар билан чекланган.

Кейинчалик Вальверде муштлашув бўлганини инкор этиб, жароҳатни тасодифан олганини айтган. Тчуамени эса воқеани тан олиб, жамоадан узр сўраган ва жазога рози бўлган.

Олинган жароҳат сабабли уругвайлик ярим ҳимоячи 10 май куни бўлиб ўтган “эл-класико”да иштирок эта олмаган. Тчуамени эса ўйинда майдонга тушган.