"Реал"да яна йўқотиш: Футболчи "Барселона"га қарши ўйнамайди!

"Реал Мадрид"нинг ўнг қанот ҳимоячиси Даниэль Карвахаль 10 май куни бўлиб ўтадиган "Барселона"га қарши ўйинни ўтказиб юборади.

Мадрид клуби 34 ёшли футболчида ўнг оёқ кичик бармоғининг дистал фалангасида ёриқ аниқланганини маълум қилди.

"Marca" нашри маълумотига кўра, Карвахаль тахминан икки ҳафта майдондан четда қолади ва мавсумнинг сўнгги ўйинида "Атлетик Бильбао"га қарши баҳсда иштирок этиши мумкин.

Маълумот ўрнида, испаниялик ҳимоячи жорий мавсумда Ла Лига доирасида 14 та учрашувда майдонга тушган.