"Реал" ва Винисиус ўртасидаги можаро сабаблари очилди

«Реал Мадрид» ва ҳужумчи ярим ҳимоячи Винисиус Жуниор ўртасида шартномани узайтириш бўйича музокаралар қарийб икки йилдан бери давом этмоқда. Шунга қарамай, томонлар ҳали ҳам умумий ечимга яқинлаша олмаётгани айтилмоқда. 

Бу ҳақда Globo нашри мухбири Кахе Мота хабар берди.

Манба маълумотига кўра, Бразилия терма жамоасининг жаҳон чемпионатидан чиқиб кетганидан сўнг «Реал» футболчига янгиланган шартнома таклиф этган. Бироқ бу вариант ҳам Винисиус томонини тўлиқ қониқтирмаган.

Айни пайтда Винисиус йилига тахминан 18,5 миллион евро маош олмоқда. Клуб президенти Флорентино Перес эса унинг иш ҳақини энг кўпи билан 20 миллион еврогача оширишга тайёр. Шу билан бирга, музокаралардаги асосий тортишув маош атрофида эмас, балки имзо учун тўланадиган бонус миқдорида кечаётгани таъкидланмоқда.

«Реал» раҳбариятининг фикрича, клубда аллақачон ўйнаб келаётган футболчи эркин агентга қараганда камроқ имзо бонуси олиши керак. Килиан Мбаппе трансфери ҳам айнан шу тамойилга асосланган ҳолда расмийлаштирилган эди.

Винисиус томони вакиллари эса талаб қилаётган бонус миқдори «Реал» унинг ўрнига янги футболчи олиб келадиган бўлса, тўлашга тайёр бўлган суммадан анча камлигини уқтирмоқда. Globo маълумотича, ҳар икки томон ўз позициясидан чекинмаяпти, шу боис музокаралар ёзги трансфер ойнаси ёпилгунига қадар давом этиши мумкин.

Манба қўшимча қилишича, Винисиуснинг ўзи ҳам қарор қабул қилишга шошилмаяпти. Январ ойидан бошлаб у эркин агент мақомига эга сифатида исталган клуб билан музокара олиб бориш ҳуқуқини қўлга киритади. Шу билан бирга, амалдаги шартномасига кўра назарда тутилган имзо бонусининг катта қисмини олиш имконияти ҳам пайдо бўлади.

Аввалроқ Винисиус «Арсенал» клуби билан шартнома шартларини келишиб олгани ҳақида хабарлар тарқалган эди.