"Реал" ва Суперлига УЕФАдан 4,5 миллиард евро компенсация талаб қилмоқда

"Реал Мадрид" клуби ва Европа Суперлигаси УЕФАдан тахминан 4,5 миллиард евро миқдорида зарар учун товон пули талаб қилмоқда.

Аввалроқ Мадриднинг провинциал суди УЕФАнинг апелляциясини рад этган эди. Шу сабабли, "Реал" ўз баёнотида ташкилотдан етказилган зарар учун компенсация талаб қилишини маълум қилди.

"As" нашрининг ёзишича, "Реал" юристлари ва Суперлига билан боғлиқ компания мутахассислари УЕФАга қарши даъво тайёрламоқда. Даъво миқдори қарийб 4,5 миллиард еврони ташкил этади.

Эслатиб ўтамиз, 2024 йил май ойида Мадрид арбитраж суди Суперлига ташкилотчилари фойдасига қисман қарор чиқарган эди. Суд қарорига кўра, УЕФА ва ФИФА рақобатбардошcиз хатти-ҳаракатларни тўхтатиши ва келгусида уларни такрорламаслиги лозим. Шунингдек, улардан аввалги бундай хатти-ҳаракатлар оқибатларини зудлик билан бартараф этиш талаб этилган.