“Реал” ва “Барса” АҚШда порлаётган “юлдузча”ни талашяпти

Мадриднинг «Реал» клуби, «Барселона» ва ПСЖ МЛСнинг «Филадельфия Юнион» клубида ўйнайдиган 17 ёшли ярим ҳимоячи Каван Салливанни кузатиб бормоқда. Бу ҳақда Mundo Deportivo хабар берди.

Манбага кўра, америкалик футболчининг 18 ёшга тўлганидан сўнг Англия чемпионатига кўчиб ўтиши бўйича «Манчестер Сити» билан келишуви бор.

Бироқ молиявий қоидалар эҳтимолий бузилгани сабаб «шаҳарликлар»га нисбатан санкциялар қўлланиши МЛСнинг «кўтарилаётган юлдузи» келажагини бутунлай ўзгартириши мумкин.

Салливаннинг МЛС клуби билан амалдаги меҳнат шартномаси 2028 йил охирига қадар амал қилади. Transfermarkt порталида келтирилган маълумотларга кўра, футболчининг бозор қиймати 10 миллион еврони ташкил этади.