"Реал" рақибни янчиб ташлади

Испания чемпионати 9-туридан ўрин олган марказий учрашувда "Реал" ўз майдонида "Севилья"ни йирик ҳисобда мағлуб этди — 4:1.

Мадридликлар таркибида ҳисобни 30-дақиқада Арда Гюлер очди. Ортидан 37 ва 63-дақиқаларда Килиан Мбаппе дубль қайд этди. Унинг иккинчи голи пеналтидан, машҳур "паненка" услубида амалга оширилди. Якуний нуқтани 82-дақиқада Ян Дьоманде қўйди. Меҳмонлар таркибида ягона голга 80-дақиқада Мануэль Буэно муаллифлик қилди.

Бу ўйин "Реал" учун Винисиус дисквалификациядан қайтганидан кейинги илк баҳс бўлди. Бразилиялик ҳужумчи ўтган турда "Вильярреал" ярим ҳимоячиси, канадалик Нейтан Салибанинг сочидан тортиб юборгани учун жазоланган эди. Ўша учрашув "Реал"нинг 1:0 ҳисобидаги ғалабаси билан якунланган.

Навбатдаги муваффақиятдан сўнг "Реал" Испания чемпионати жадвалида 3-поғонага кўтарилди. Жамоа ҳисобида ҳозирча 21 очко бор. "Севилья" эса 14 очко билан 6-ўринни эгаллаб турибди. Кейинги турда, 25 октябрь куни "Реал" сафарда мусобақа пешқадами "Барселона"га қарши майдонга тушади. "Севилья" эса бир кун ўтиб ўз майдонида "Осасуна"ни қабул қилади.

Аввалроқ хабар берилганидек, "Барселона" мавсум бошидан бери қатор ғалабалар серияси бўйича "Реал" рекордини такрорлади. Каталония клуби чемпионатнинг дастлабки тўққиз турининг барчасида ғалаба қозонган.