“Реал” “Ливерпуль” трансферидан 20 миллион евро ишлаб олди

Мадриднинг «Реал» клуби испаниялик қанот ҳужумчиси Виктор Муньоснинг «Осасуна»дан «Ливерпуль»га трансфери учун 20 миллион евро олади.

Бу ҳақда машҳур инсайдер Фабрицио Романо X ижтимоий тармоғида маълум қилди. Аввалроқ, Англия клуби 22 ёшли футболчининг трансферини расман эълон қилган эди.

Манбага кўра, «Ливерпуль» Муньоснинг «Осасуна» билан шартномасида кўрсатилган 40 миллион евролик товон пулини тўлаш орқали унинг трансферини амалга оширган. Журналист маълумотига кўра, ушбу маблағнинг ярми – 20 миллион евро мадридликлар ҳисобига ўтказилади.

Виктор Муньос «Барселона» академияси тарбияланувчиси ҳисобланади. У 2021 йил ёзида «Реал»нинг ёшлар тизимига қўшилган. Ўтган мавсумда футболчи Ла Лига ва Испания Кубогида жами 36 та ўйинда майдонга тушиб, 7 та гол ва 5 та голли узатма қайд этган.