“Реал” Эндрикни сўраган суперклубларга жавобини айтди

Англия Премьер-лигасининг бадавлат клубларидан “Челси” ва “Арсенал” Мадриднинг “Реал” жамоаси ҳужумчиси Эндрикка жиддий қизиқиш билдирмоқда.

Бразилиялик ёш футболчи жорий мавсум бошида “Реал” асосий таркибига кириши қийинлашиб кетгани боис,  қишки трансферлар ойнаси даврида Франциянинг “Лион” жамоасига ижарага берилган эди.

“Қироллик клуби” Лондон жамоалари сўровига жавоб қайтариб, раҳбарият 19 ёшли ҳужумчини сотиш вариантини кўриб чиқмаётганини маълум қилди.

Манбага кўра, “Реал” Эндрикнинг қайтишини кутмоқда ва у келаси мавсум учун режаларга киритилган. Таъкидланишича, ҳужумчининг ўзи ҳам жамоада қолиб, асосий таркиб учун курашишга қатъий қарор қилган.

Клуб президенти Флорентино Перес улар жаҳон футболидаги энг яхши ёш ўйинчини сотиб олганига ишонч билдирмоқда.

“Лион” сафига ўтганидан кейин Эндрик барча турнирларда 18 ўйинда майдонга тушиб, рақиблар дарвозасига 7 та гол урган. Унинг мадридликлар билан амалдаги шартномаси 2030 йил ёзигача мўлжалланган.

Transfermarkt маълумотига кўра, футболчининг бугунги кундаги трансфер бозоридаги қиймати 35 миллион еврони ташкил қилмоқда.