Расман: Ўзбек боксчиси WBA чемпионлик жангидан маҳрум этилди! Чемпион бошқа рақиб танлади
- 9-октябр, 06:09
- Zohir Toshxo’jayev
- 0
- Бокс
Иккинчи ўрта вазн тоифасида WBA чемпионлик камарига мажбурий даъвогар бўлиб келаётган ўзбекистонлик боксчи Бектемир Мелиқўзиев расман чемпион Хайме Мунгиага қарши жангдан маҳрум бўлди.
Бу ҳақда DAZN Boxing хабар берди.
Кеча Riyadh Season промоутерлари 31 октябрь куни Саудия Арабистони пойтахти Ар-Риёд шаҳрида бўлиб ўтадиган бокс кечасининг тўлиқ дастурини эълон қилди. Шоунинг бош жангида собиқ мутлақ жаҳон чемпиони, мексикалик Сауль «Канело» Альварес мағлубиятсиз фаолият юритаётган француз боксчиси Кристиан Мбиллига қарши WBC камари учун рингга кўтарилади.
Кечанинг андеркардида эса Хайме Мунгиа ўзининг WBA жаҳон чемпионлиги камарини ихтиёрий тарзда ҳимоя қилади. Унга рақиб сифатида мағлубиятсиз одимлаётган россиялик Никита Зоня танланган. Зоня ҳозирда WBA рейтингининг 9-поғонасида жойлашган.
Эслатиб ўтамиз, сентябрь ойида WBA Мунгиага айнан Бектемир Мелиқўзиевга қарши мажбурий ҳимоя жангини ўтказиш бўйича кўрсатма берган эди. Ўзбек боксчиси бир йилдан ортиқ вақт давомида мажбурий даъвогар мақомини сақлаб келаётганди. Томонларга музокараларни 21 октябрга қадар якунлаш учун муддат белгиланган эди.
Аввалроқ Мунгиа жамоаси Мелиқўзиевга титул жангидан воз кечиши эвазига молиявий компенсация таклиф қилгани ҳақида хабарлар тарқалган.
Ўзбек боксчиси бу таклифни рад этди ва ҳатто гонорарсиз ҳам жанг қилишга тайёр эканини маълум қилди. Шунингдек, у жангни Ўзбекистонда ташкил этишни таклиф қилиб, Мунгиа томонига жанг ўтказиш харажатларига қўшимча маблағ ажратишга тайёрлигини айтган эди.
Айрим манбаларнинг таъкидлашича, амалдаги чемпион Мунгиа ўта кучли зарбага эга Бектемирдан қочиб юрибди. Мелиқўзиев ижтимоий тармоқлар орқали бир неча бор мажбурий даъвогар сифатида жанг камар учун жанг ўтказишга ҳақли эканини таъкидлаб, мурожаат йўллади.