Рамосни суперклубга жойлашмоқчи

Мексика чемпионатини тарк этган машҳур ҳимоячи Серхио Рамос ўзига Европа клубларидан муносиб иш қидирмоқда. Бироқ ҳали тажрибали ўйинчини ўз сафига қўшиб оладиган жамоа топилгани йўқ.

39 ёшли футболчи “кўҳна қитъа”га рақобатбардош жамоада ўйнаб, узоқ муддатли танаффусдан кейин Испания терма жамоасига чақирув олиш ва 2026 йилги жаҳон чемпионатида иштирок этиш мақсадида қайтган.

Италиянинг  Repubblica нашри аниқлик киритишича, Рамоснинг агенти А Сериянинг энг қудратли клубларидан “Милан” раҳбариятига ҳамкорлик истиқболлари бўйича мурожаат қилган.

Миланликлар яқинда Европага қайтган яна бир тажрибали ўйинчи – Тьяго Силвани олишга уриниб кўрганди. Бироқ бразилиялик юлдуз бошқа клубни танлади. Энди миланликлар бу бўшлиқни Серхио Рамос билан тўлдириши мумкинлиги айтиляпти.

Рамос узоқ йиллик фаолияти давомида Испания, Франция ва Мексика чемпионатларида ўйнаган. У ҳали А Серияда ўзини синаб кўргани йўқ.