Рамос “Севилья”ни сотиб олиши учун қанча керак?

Испания футболидаги энг машҳур футболчилардан Серхио Рамос хорижий инвесторлар қўллаб-қувватлови билан ўзини тарбиялаган “Севилья” клубини сотиб олиш бўйича таклиф билдирди.

Бу ҳақда журналист Гильермо Раи хабар бермоқда. Манбага кўра, клубни сотиб олиш учун тузиладиган  битим қиймати 400 миллион еврога баҳоланмоқда.

39 ёшли футболчи лойиҳанинг асосий инвестори бўлмайди, бироқ айнан у лойиҳанинг юзи ва жамоатчилик олдидаги асосий вакилига айланади. Манбага кўра, мазкур келишувда Америка инвестиция фонди ҳам иштирок этмоқда.

“Севилья” ҳозирда қийин молиявий аҳволда. Айни пайтда клубнинг қарзлари тахминан 180 миллион евродан ошяпти.

Серхио Рамос фаолиятини айнан Андалусия клубида бошлаган ва 2005 йилда Мадриднинг “Реал” жамоасига ўтган эди. 2023 йилда у яна “Севилья”га қайтиб бир йил ўйнади ва кейинчалик Мексиканинг “Монтеррей” жамоасида қисқа фурсат тўп тепиб келди.