Қоч, Файзуллаев келяпти!
- 20-август 2025, 22:51
- Zohir Toshxo’jayev
- 0
- Футбол
Ўзбекистон миллий терма жамоаси ҳужумкор футболчиси Аббосбек Файзуллаев янги жамоаси – “Истанбул Башакшеҳир”даги дебютини УЕФА таснифидаги халқаро мусобақа – Конференциялар лигасида нишонлаши кутилмоқда.
Истанбул клубига шу ёз қўшилган яна бир легионеримиз Элдор Шомуродов ҳам Туркия жамоаси учун илк учрашувини айнан қитъа миқёсидаги турнирда ўтказган эди. Бошланғич таркиб ўйинчиси даражасига кўтарилиши учун учта ўйин кифоя қилган тажрибали ҳужумчимиз турк Суперлигасидаги фаолиятини ҳам бошлаб юборди.
Куни кеча Аббосбек Файзуллаев трансфери бўйича юзага келган барча муаммоларал этилди. “Истанбул Башакшеҳир” раҳбариятини трансфер учун тўловни тўлиқ амалга оширди. ЦСКА ўйинчини трансфер сертификатини жўнатди. Энди Файзуллаев расмий учрашувларда майдонга тушиш имкониятига эга бўлади.
“Башакшеҳир” Болгариянинг “Черно Море” ва Норвегиянинг “Викинг” клубларини ортда қолдириб, Конференциялар лигасининг плей-офф босқичи чиқди. Энди гуруҳ баҳсларига қўшилиш учун истанбулликлар иккита учрашувда Руминиянинг “Университетя Крайова” қаршилигини синдириши керак.
Биринчи учрашув 21 август куни Истанбулда бўлади. Sports.uz портали “Башакшеҳир” бош мураббий Чағдаш Атан билдирган фикр-мулоҳазаларни ўзбекистонлик футбол ишқибозлари эътиборига ҳавола этади.
Ўйин ҳақида
Биз мавсумдаги энг муҳим ўйинлардан бирини ўтказамиз. Аввалроқ иккита жуда яхши жамоа билан куч синашиб, ижобий натижа қайд этдик ва юқори босқичларга кўтарилдик. Биз жамоамиз ва мамлакатимиз шарафини Европа майдонларида муносиб ҳимоя қилиш мақсадида бўлажак ўйинга пухта тайёргарлик кўряпмиз.
Рақибимиз кучли жамоа. Биз трибуналарни тўлдирган мухлисларимиз қўллаб-қувватлаши остида ўзимиз учун ижобий натижани қўлга киритмоқчимиз. Рақибимиз Руминия лигасининг етакчиларидан бири ҳисобланади.
Бу йил ҳозирги натижага эришиш учун жуда мураккаб йўлни босим ўтишимизга тўғри келди. Биз, энг аввало, футболчиларимиз билан бирга пухта таҳлил ўтказдик. Ўйинга тўғри тактика танладик, деб ўйлайман. Рақиб жамоани ҳам, уларнинг бош мураббийини ҳам ҳурмат қиламиз. Бўлажак учрашувда яхши ўйин намойиш қилишдан умидвормиз.
Суперлига ўйинлари муддати ўзгаргани ҳақида
Туркия Суперлигаси ташкилотчиларининг миллий чемпионатдаги ўйинлар санасини ўзгартириб берганини ижобий баҳолаймиз. Хусусан, ўтган гали рақибимиз “Викинг” олти кун ичида учта ўйин ўтказишга мажбур бўлди. Ички чемпионатда тақвимнинг ўзгариши бизга манфаатли бўлди ва биз плей-оффнинг ҳал қилувчи учрашувига етиб келдик.
Туркиянинг тўртта клуби плей-оффнинг финалида ўйнаяпти. Бу мамлакат лигаси мавқеи учун катта натижа. Халқаро майдонда ўйнаётган “Фенербаҳче”, “Самсун” ва “Бешиктош”га муваффақият тилайман.
Файзуллаев ҳақида
Аббосбек Файзуллаев энди биз билан бирга. Трансфернинг зарурий жараёнлари тўлиқ якунланди. Энди Аббос майдонда ўз ўрнини эгаллаши мумкин.
Эслатиб ўтамиз, “Истанбул Башакшеҳир” ва “Университетя Крайова” ўртасидаги учрашув 21 август куни Тошкент вақти билан соат 22:45 да бошланади.