Қирғизистон ММА оламида нима гап?
- 26-июн, 11:56
- Javohir Malikov
- 0
- MMA
Сўнгги йилларда Қирғизистон аралаш яккакураш (ММА) оламида жиддий ўсишга эришди. Авваллари бу мамлакат номи асосан UFC чемпиони Валентина Шевченко билан боғланган бўлса, бугун дунёнинг нуфузли промоушенларида қирғизистонлик жангчилар кетма-кет ёрқин натижалар қайд этмоқда.
Валентина Шевченко – аёллар ММА сининг тирик афсонаси
UFC нинг аёллар P4P рейтингида биринчи ўринда бораётган Валентина Шевченко нафақат сайёрамизнинг энг кучли аёл жангчиси, балки тарихдаги энг буюк ММА жангчиларидан бири бўлиш учун даъвогар саналади.
Мыктыбек Оролбай – UFC рейтингига киришга яқин
Мыктыбек UFC да 5 ғалаба ва 1 мағлубият қайд этган. Унинг ягона мағлубияти ҳам бошқа вазнда, очколар эвазига бўлган. Мутахассислар яқин орада унинг "UFC TOP-15" рейтингига кириши ва чемпионлик пойгасига қўшилишини кутмоқда.
Раджабали Шайдуллаев – 18 та жанг - 18 та финиш!
25 ёшли Раджабали Шайдуллаев профессионал фаолиятида 18 та жанг ўтказиб, уларнинг барчасида муддатидан олдин ғалаба қозонган. Амалдаги Rizin чемпиони камарини бир неча бор муваффақиятли ҳимоя қилди. Айни пайтда у дунёдаги энг келажаги порлоқ ММА жангчиларидан бири сифатида эътироф этилмоқда. Ҳатто яқин орада UFC билан шартнома имзолаши мумкинлиги ҳақида ҳам хабарлар тарқаляпти.
Муртазали Магомедов – UFC тарихига кирган дебют
Муртазали Магомедов UFC даги илк жангидаёқ тарихга кирди. У промоушен тарихида илк бор "Scottish Twister" усули орқали ғалаба қозонди ва профессионал рекордини 11-0 га етказди. Ҳозирга қадар у Octagon промоушенида 66 килограмм вазн тоифаси чемпиони бўлган.
Жакшылык Мырзабеков – АCА чемпиони
Ярим ўрта вазн тоифасида АCА чемпиони Жакшылык промуошеннинг P4P рейтингида ТОП-5 дан жой олган. У 2022–2026 йиллар оралиғида 10 ғалаба ва 1 мағлубият қайд этди. Ягона мағлубияти ҳам очколар эвазига бўлган.
Эдил Эсенгулов ҳам юқори даражада
АCА ўрта вазн тоифасининг ТОП-5 жангчиларидан бири ҳисобланган Эдил 2021 йилдан буён 17 та ғалаба ва атиги битта мағлубият қайд этган. Шунда ҳам жуда кучли рақиб Абубакар Вагаевга очколар эвазига имкониятни бой берган.
Қирғизистон ММА сида янги даврни бошламоқда. Мамлакатда бу спорт оммалашиб бораётгани ва аҳоли сонининг ҳар йили 100–200 минг кишига кўпаяётгани инобатга олинса, яқин ўн йил ичида Қирғизистондан етишиб чиқадиган юқори даражадаги жангчилар сони янада ортиши мумкин.