Пул бўлса қанийди! “Барса”га иккита суперҳужумчини таклиф қилишди

“Барселона” раҳбарияти 36 ёшли Роберт Левандовскининг ўрнини боса оладиган тўпурар қидиришни давом эттирмоқда.

Sport.es сайтининг маълум қилишича, футбол агентлари каталонияликларга жамоасини ўзгартириши кутилаётган икки нафар номзодни таклиф қилган. Улар қимматбаҳо ўйинчилар қаторида зикр этиладиган Виктор Осимхен ва Душан Влаховичдир.

25 ёшли Влаховичнинг “Ювентус” билан шартномаси бир йилдан кейин тугайди. Шу боис, туринликлар серб футболчисини нисбатан арзонроқ қўйиб юбормоқчи. Бундан ташқари, “Ювентус” мутасаддилари Влаховичнинг трансферига “Барса”дан ўйинчи қўшишга тайёр. Лекин ҳозирча туринликлар ўзлари танлаган ўйинчи номини айтмаяпти.

26 ёшли Виктор Осимхен “Наполи”га тегишли. Италия гранди раҳбарият билан муносабати бузилган нигериялик тўпурарни 75 миллион евродан камига қўйиб юбормайди. Бу сумма “Барселона”га оғирлик қилади.