ПСЖ зўр ҳимоячини Англиянинг уч клуби билан талашяпти

Франциянинг «Пари Сен-Жермен» клуби, Англиянинг «Манчестер Сити», «Манчестер Юнайтед» ва «Арсенал» жамоалари «Порту»нинг ўнг қанот ҳимоячиси Алберту Коштани ўз сафига қўшишдан манфаатдор.

Caught Offside агентлик соҳасига яқин манбаларга таяниб, ушбу клублар 23 ёшли футболчини фаол кузатаётганини хабар қилди.

Манба маълумотига кўра, ҳозирча расмий таклифлар келиб тушмаган. Қизиқиш билдираётган клублар ҳали ўрганиш ва таҳлил босқичида. Коштанинг «Порту» билан шартномасида 65 миллион евро миқдорида товон пули белгиланган. Ушбу сумманинг 10 фоизи португалиялик футболчининг собиқ клуби — Туриннинг «Ювентус»ига тегиши керак.

Хабар қилинишича, эҳтимолий трансфердаги мураккаблик Коштанинг амалдаги клуби билан шартнома муддати билан боғлиқ. Ҳимоячи ўтган ёзда «Ювентус»дан 15 миллион евро эвазига «Порту»га ўтган ва клуб билан 2030 йил июнига қадар шартнома тузган.