Премьер-лига! Ўрозовнинг трансфери ҳал бўлди

Россия Премьер-лигасида иштирок этаётган Қозоннинг «Рубин» клуби Самарқанднинг «Динамо» ва Ўзбекистон миллий терма жамоаси ҳимоячиси Жаҳонгир Ўрозовни ижарага олиш бўйича келишувга эришди. 

Бу ҳақда россиялик инсайдер Иван Карпов хабар берди.

Карповнинг маълум қилишича, «Рубин» 22 ёшли марказий ҳимоячи учун 100 минг евро миқдорида тўловли ижара шартномасини тузмоқда. Мавсум якунида футболчини сотиб олиш ҳуқуқи ҳам кўзда тутилган — унинг қиймати 700 минг евро этиб белгиланган. Айтишича, 30 июль куни кечқурун чапақай марказий ҳимоячи тиббий кўрикдан ўтиш учун Қозонга йўл олади.

Шу тариқа битимнинг умумий қиймати 800 минг еврони ташкил этиши мумкин. Шундан 100 минг евро ижара пули сифатида, яна 700 минг евро эса кейинчалик тўлиқ трансфер учун мўлжалланган.

Жаҳонгир Ўрозов 2004 йилнинг 18 январь куни Жиззах вилоятида туғилган. Унинг бўйи 190 сантиметр, вазни тахминан 83 килограмм. Асосий позицияси — марказий ҳимоячи, бироқ у зарурат туғилганда ҳимоянинг чап қанотида ҳам ўйнай олади. Ишчи оёғи — чап.

Мутахассислар Ўрозовнинг кучли томонлари сифатида жисмоний қуввати, яккакурашлардаги муваффақиятли ўйини, ҳаводаги курашларда устунлиги, тўпни шиддат билан тортиб олиши ва ҳимоя чизиғидан олдинга чиқиб, пасларини узатиш қобилиятини алоҳида  қайд этишади. 

Айниқса, унинг биринчи паси алоҳида эътироф этилади: ҳимоячи пастдан ҳужумни бошлаб, тўпни чизиқлар орасида аниқ узатмалар билан олдинга силжита олади. Карповнинг таъкидлашича, ўйин услуби бўйича у Маттейс де Лигтни эслатади.

- Унинг ўйини де Лигтни жуда кўп эсга солади. Шунга ўхшаш бақувват, агрессив, доим олдинга ўйнайди ва жисмоний кучига таянади. Бироқ унда ҳали етарлича чаққонлик ва позицияни тўғри танлаш бўйича тажриба етишмайди. 190 сантиметр бўйга эга, ёш ҳимоячи учун бу табиий ҳолат. Малакаси юқори мураббийлар билан ишласа, вақт ўтиши билан бу камчиликларни ёпиш ёки бутунлай бартараф этиш мумкин, — деб таъриф берган эди Карпов.

Ўзбекистон чемпионатида Ўрозов ҳимоявий кўрсаткичлар бўйича етакчилар қаторида бўлди: у ғалаба қозонган яккакурашлар, пасни кесиб қўйиш ва муваффақиятли тўп тортиб олишлар сони бўйича энг юқори поғоналарни эгаллаб келди. Шу билан бирга, унинг ривожланиши лозим бўлган жиҳатлари сифатида тезлик билан йўналишни ўзгартириш, позиция танлаш ва катта бўшлиқларда тезкор ҳужумчиларга қарши ўйин кўрсатиб ўтилади.

Ўрозов футбол сирларини Тошкентнинг «Бунёдкор» клуби тизимида ўзлаштирган. Асосий жамоа сафида дебютини 2022 йилда ўтказган. 2023 йилда у Туркиянинг «Эюпспор» клубига йўл олди, шундан сўнг Самарқанднинг «Динамо» клуби томонидан ижарага олинди. 2025 йил февраль ойида «Динамо» унинг тўлиқ трансферига эга чиқди.

Ёшлар даражасида Ўрозов 2023 йилда U-20 Осиё кубоги ғолиби бўлган Ўзбекистон ёшлар терма жамоаси таркибида майдонга тушган. Ўша йили у ёшлар ўртасидаги жаҳон чемпионатида ҳам иштирок этиб, турнирда тўртта ўйин ўтказган.

2026 йил баҳорида ҳимоячи катталар ўртасидаги Ўзбекистон терма жамоасида дебют қилди. Илк учрашувидаёқ, яъни Габонга қарши беллашувда гол уриб, жамоага 3:1 ҳисобидаги ғалабани қўлга киритишда ёрдам берди.

Ёзда Ўрозов Ўзбекистон тарихидаги илк жаҳон чемпионати учун терма жамоанинг якуний рўйхатига киритилди. У гуруҳ босқичидаги икки учрашувда майдонга тушиб, жами 93 дақиқа ўйнади: Колумбияга қарши баҳсда захирадан майдонга тушди, Конго билан ўйинда эса асосий таркибда ҳаракат қилди. 

Испаниялик мураббий ўзбек футболчиси трансферини тасдиқлади

Файзуллаевга Германиядан жиддий рақобатчи келди

Шомуродовни машҳур клубда кўришмоқчи! Элдор ҳар қандай жамоани кучайтиради

Шомуродов энди Финляндияда ўйнайди

Яхши бор, Ҳусанов! “Сити” Абдуқодирни кузатиб қўйди!

“Манчестер Сити”: Ҳусанов бу ишни қилганда нега бутун стадион “Хууууус!” деб ҳайқиради?

Шомуродовнинг қадрдон устози терма жамоани бошқаришга ёрдам беради

Ҳусанов синган оёқ билан майдонга тушганини тан олди

Икки ўзбек “Брага”га нега керак?