Премьер-лига тарихида амалга оширилган энг қиммат трансферлар (топ-10)

Сўнгги вақтларда АПЛда кўплаб катта трансферлар амалга оширилиб, бу борадаги рекордлар янгиланмоқда. Ҳозир сизлар билан АПЛ тарихида амалга оширилган энг катта трансферларга тўхталиб ўтамиз: 

10. Антони (“Манчестер Юнайтед, 2022”) – 85 миллион фунт стерлинг

“Манчестер Юнайтед” Антони билан шартнома имзолаш учун бир неча ойлар давомида ҳаракат қилган. Бразилиялик ўнг қанот ҳужумчи “Аякс”даги яхши мавсумлари орқали футбол оммасига танилган ва 2022 йилда Манчестер шаҳрига кўчиб ўтган. Трансфер суммаси 80.75 миллион фунт стерлинг, 4.25 миллион фунт стерлинг бонуслари билан.

Якунда Антони жамоадаги омадсиз ўйинлардан сўнг ушбу мавсум Испаниянинг “Бетис” жамоаси сафига бориб қўшилди.

9. Михаил Мудрик (“Челси”, 2023) – 88.5 миллион фунт стерлинг  

Михаил Мудрик даставвал “Челси”га 62 миллион фунт стерлинг эвазига трансфер қилинганди, кейинчалик лондонликлар “Шахтиёр Донецк” сафига бонус сифатида яна 26.5 миллион фунт стерлинг ўтказиб берган. Мудрик “кўклар” сафида 5 та гол урган ва 6 та ассистни амалга оширган. Афсуски, футболчи допинг тести салбий чиққани боис дисквалификацияга учраган. 

8. Поль Погба (“Манчестер Юнайтед”, 2016) - 89 миллион фунт стерлинг 

Погбанинг “Олд Траффорд”га келиши 2016 йилда катта шов-шувларга сабаб бўлганди. Даставвал, у профессионал футболдаги фаолиятини “Ювентус” сафида бошлаган. Туринда Погба дунё бўйича энг кучли ярим ҳимоячилар сарасига киради. Шу боисдан МЮ футболчига жиддий қизиқиш билдириб, 2016 йилда жамоа сафига қўшиб олади.

7. Ромелу Лукаку (“Челси”, 2021) - 97.5 фунт стерлинг 

Лукаку 2021 йилда “Интер” сафидаги супер мавсумларидан сўнг "Челси" сафига катта пуллар эвазига келиб қўшилади. Бироқ бельгиялик ҳужумчи ўзидан кутилган ўйинни намоиш эта олмайди. Умумий миқдорда, Лукакунинг трансферларига турли жамоалар томонидан 290 миллион фунт стерлинг сарфланган. 

6. Жек Грилиш (“Манчестер Сити”, 2021) - 100 миллион фунт стерлинг 

2021 йилда Жек Грилиш англиялик энг талантли футболчилардан бири сифатида “шаҳарликлар” сафига келиб қўшилди. Таъкидлаш жоизки, Пеп Гвардиола қўлида бир нечта мавсумлар давомида яхши ўйин кўрсатди, аммо ундаги ёмон иллатлар якунда унинг умумий ўйинига ҳам таъсир қилди. Якунда, ёзги трансферлар ойнасида “Эвертон” жамоаси сафига бориб қўшилди. 

5. Деклан Райс (“Арсенал”, 2023) - 105 миллион фунт стерлинг

Деклан Райс “Арсенал” сафига қўшилганидан сўнг қисқа муддат ичида мухлисларнинг севимли футболчисига айланди. 2024/25 йилги мавсумда Чемпионлар Лигаси доирасида “Реал Мадрид”га жарима зарбаларидан урган голлари унинг фаолиятидаги энг ёрқин лаҳзалардан бири бўлди. Шу билан биргаликда, сўнгги мавсумларда Райс терма жамоа ва клуб сафидаги ажралмас бўлакка айланишга улгурди. 

4. Энцо Фернандез (“Челси”, 2023) - 107 миллион фунт стерлинг

Қатарда бўлиб ўтган Жаҳон Чемпионатининг ёрқин кашфиётларидан бири Энцо Фернандес “Бенфика”дан “Челси”га рекорд суммадаги трансфер эвазига кўчиб ўтди. Ушбу харид “Челси”даги янги даврнинг бошланишига сабабчи бўлди ва Энцо қисқа вақт мобайнида жамоа сардорига айланди.

3. Мойзес Кайседо (“Челси”, 2023) - 115 миллион фунт стерлинг 

Премьер-лиганинг икки гранди – “Ливерпуль” ва “Челси” – қизиқишлари доирасида бўлган Мойзес Кайседо якунда Лондон жамоаси сафига бориб қўшилади. Шу тариқа, Энцо ҳамда Кайседо дуети жамоанинг муваффақиятларида асосий роль ўйнади. Трансферга сарфланган катта пуллар аллақачон ўзини оқлади, деб бемалол айтишимиз мумкин. 

2. Флориан Вирц (“Ливерпуль”, 2025) - 116 миллион фунт стерлинг 

2025 йилги ёзги трансферлар ойнасининг энг қиммат харидларидан бири бўлган Флориан Вирц дастлабки 3 баҳсда ўзидан кутилган ўйинни намойиш эта олганича йўқ. Олдинда “Ливерпуль” жамоасини “Атлетико Мадрид”, “Манчестер Юнайтед” ва “Реал Мадрид”га қарши қийин учрашувлар кутиб турибди.

1. Александер Исак (“Ливерпуль”, 2025) - 130 миллион фунт стерлинг 

Исакнинг “Ливерпуль” жамоаси сафига қўшилиши трансферлар ойнасининг сўнгги кунигача барчанинг қизиқишлари доирасида бўлиб турди. “Ньюкасл” футболчини жамоада олиб қолишни ҳар қанча истамасин, якунда “Ливерпуль” жамоаси футболчи билан шартнома имзолашга эришди. Эндиликда Слотда топ даражадаги икки ҳужумчи бор – Экитике ва Исак. Лекин савол туғилади. “Ливерпуль” 4-4-2 тактик схемасига ўтадими ёки ҳужумдаги рақобатни юқори даражага олиб чиқадими?