Португалия олтмиш йилда шунақа натижа қилди

Португалия терма жамоаси жаҳон чемпионатида 60 йил ичида илк бор иродавий ғалабага эришди. Бу натижа Хорватияга қарши 1/16 финал баҳсида қайд этилди.

Учрашув 2:1 ҳисоби билан якунланди. 53-дақиқада ҳисобни Хорватия ярим ҳимоячиси Иван Перишич очди. Шундан сўнг португаллар таркибида Криштиану Роналду 68-дақиқада пенальтидан гол урди, 90+4-дақиқада эса Гонсалу Рамуш ғалаба голини киритди.

Португалия терма жамоаси жаҳон чемпионатида охирги бор ҳисобда ортда келаётган ҳолда 1966 йилда ғалаба қозонган эди. Ўша пайтда чорак финалда КХДР жамоаси 5:3 ҳисоби билан мағлуб этилган.

Жаҳон чемпионатида Португалиянинг кейинги рақиби Испания бўлади. 1/8 финал учрашуви 6 июль куни ўтказилади.

Жаҳон чемпионати АҚШ, Канада ва Мексика ҳудудларида ўтмоқда. Турнир 19 июль куни якунланиши режалаштирилган.