Паркентда анъанавий турнир бўлиб ўтди

Жорий йилнинг 9 май куни Тошкент вилоятининг Паркент туманидаги "Гулбоғ" номли стадионида миллий спорт турларимиз бўлган кураш ва белбоғли кураш бўйича “Хотира ва қадрлаш куни” муносабати билан Паркент тумани ҳокими кубоги учун анъанавий Республика очиқ турнири бўлиб ўтди.

Паркент тумани ҳокимлиги, Паркент тумани прокуратураси, Ўзбекистон белбоғли кураш федерацияси, Тошкент вилояти спорт бошқармаси, Тошкент вилояти кураш федерацияси ҳамда Паркент туман спорт мактаби ҳамкорлигида ўтказилган мазкур очиқ турнирда мамлакатимизнинг деярли барча вилоятларидан 300 нафарга яқин энг сара спортчилар иштирок этишди. 

Полвонлар кураш бўйича 73, 81, 90, 100, +100 килограмм вазн тоифасида, белбоғли кураш бўйича эса 50, 55, 60, 66, 73, 81, 90, 100, +100 килограмм вазн тоифасида ўз имконият ва маҳоратларини намойиш этишди.
9 май эрталабдан бошланган саралаш баҳслари кураш ва белбоғли мусобақасини томоша қилишга ташриф буюрган мухлислар учун ҳақиқий спорт байрамига айланиб кетди.

Куннинг иккинчи ярмида турнирининг тантанали очилиш маросим ташкил этилди. Унда Паркент туман ҳокими Элмурод Пўлатов, Ўзбекистон халқ шоири Маҳмуд Тоир, Ўзбекистон белбоғли кураш федерацияси раиси Равшан Дастиров ва бошқалар иштирок этди. 
Маросимда сўз олганлар Давлатимиз раҳбари томонидан жисмоний тарбия ва спортни, хусусан, миллий спорт турларимизни ривожлантиришга қаратилаётган амалий ёрдам ва эътиборни яна бир бор эьтироф этишди. 
Очилиш маросими доирасида туман ҳокимлиги томонидан паркентлик бир қатор белбоғли кураш фидоийларига ва фахрий полвонларга эҳтиром кўрсатилиб, эсдалик совғалари улашилди.

Шунингдек, Ўзбекистон белбоғли кураш федерацияси раиси томонидан ҳам мазкур спорт турини ривожлантиришга қўшаётган ҳиссаси учун спорт фахрийларига ташаккурнома ва эсдалик совғалари топширилди.  Беллашувларининг ярим финал, финал босқич учрашувлари муросасиз ва қизиқарли лаҳзалари билан мухлисларга завқ ва шавқ бахшида этди.

Мухлислар айниқса, паркентлик полвонларнинг чиқишларини ҳаёжон билан кузатишди.
Кун давомида бўлиб ўтган шиддатли беллашувларда Ҳасан Азимов (55 кг. Паркент т.), Рамзиддин Абдуҳамидов (60 кг. Андижон), Х. Абдуҳакимов (90 кг. Сирдарё), Ҳусан Умарбоев (100 кг. Паркент т.), Аъзам Анваржонов (+100 кг. Андижон), Шерали Жўраев (+100 кг. Қашқадарё) сингари полвонлар барча рақибларидан устун келиб, ғолибликни қўлга киритди.

Мусобақа сўнггида барча вазн тоифаларидаги ғолиб ва совриндорлар диплом, медал ва қимматбаҳо эсдалик совғалари билан мукофотланишди.