"Ўзимни Европада синаб кўриш учун келдим" - Словакияда ўйнаётган легионеримизни биласизми?

Четда тўп сураётган легионеримиз сони яна биттага кўпайди. Гап шундаки, ўзбекистонлик ҳужумчи Мўмин Мелиев Словакия чемпионатида тўп суряпти.

Словакияда бир нечта чемпионатлар бўлиб, 27 ёшли футболчимиз Словакия учинчи дивизион вакили – “Партизан Бардийов” жамоаси аъзосига айланди. Мелиев у ерда ҳаттоки голлар уришни бошлаб юборди.

Мўмин юртимизда “Сўғдиёна”, “Машъал”, “Қўқон-1912”, “Локомотив”, “Хоразм” каби клубларда ўйнаган. Словакияга кетгунга қадар у Тожикистоннинг “Истаравшан” жамоасида ярим мавсум тўп сурди.

Sports.uz журналисти Мўмин Мелиев билан боғланди.

- Мўминжон, фаолиятингизни Словакия чемпионатида давом эттирмоқдасиз. Очиғи, буни кўпчилик кутмаганди. У ерга қандай бориб қолдингиз?

- Тожикистонда ўйнаб юрган пайтимда бир агент менга ёзди. У ўзингни Европада синаб кўрасанми, таклиф бор, сенга қизиқиш билдиряпти деди. Мен эса бу чақирувга рози бўлдим. Янги жамоам пастки ўринлардан бирида кетяпти. Мақсад жамоага ёрдам бериб, яхши ўйинлар кўрсатиш, голлар уриш ва янада кучлироқ дивизионларга чиқиш.

- Ўтган йили "Хоразм" ва сўнг Тожикистоннинг "Истаравшан" клубида ўйнадингиз. Бу жамоалардаги фаолиятингиздан қониқмадингизми?

- “Хоразм” билан Тожикистондаги фаолиятимга келсак, ҳаммаси яхши бошланганди. Кутилмаганда жароҳат олдим. Натижада яна пасайиш бўлди. “Истаравшан”да эса 40-50 фоизга кўнглим тўлди. Яхши ўйинлар бўлди, ҳамма учрашувларда иштирок этдим, голлар урдим. Бундан ҳам яхшироқ натижа кўрсата олардим. Лекин шунақа ёзилган экан. 

- Янги жамоа ва янги менталитетга кўникишга қийналмаяпсизми?

- Менталитетга қийналганим йўқ. Ҳаммаси яхши.

- Дебют голингизни урганингиз ўзингизга ишончни янада оширгандир. Жамоа қандай қабул қилди?

- Биринчи ўйинда мусобақанинг иккинчи ўринда бораётган жамоасига 4:1 га ютқаздик. Жамоамнинг ягона голини урдим. Иккинчи учрашувда 3-ўриндаги рақиб билан 2:2 ўйнадик, яна битта гол урдим. Ўзимни Европада синаб кўриш учун келдим.