ЎзДЖТСУда кураш бўйича халқаро илмий—амалий анжуман бўлиб ўтди

Жорий йилнинг 22 апрель куни Чирчиқ шаҳридаги Ўзбекистон давлат жисмоний тарбия ва спорт университетида ўзбек миллий спорти — курашнинг халқаро нуфузини илмий ва амалий жиҳатдан мустаҳкамлашга қаратилган “Кураш спортини ривожлантиришнинг назарий-амалий аспектлари” мавзусидаги халқаро илмий-амалий анжуманнинг ялпи мажлиси ҳамда кураш мураббийларига халқаро 
"B" тоифали лицензия учун мўлжалланган “Уч ойлик онлайн курс”нинг бир ҳафталик амалий машғулотларининг очилиш маросими бўлиб ўтди.

Спорт вазирлиги, ЎзДЖТСУ хусусан, ЎзДЖТСУнинг Миллий кураш турлари назарияси ва услубияти  кафедраси, Халқаро кураш институти ва Халқаро кураш ассоциацияси ҳамкорлигида ташкил этилган тадбирда соҳанинг етакчи олимлари ҳамда 15 дан ортиқ давлатдан 30 нафардан зиёд хорижий мутахассис иштирок этди.

Юқори савияда ташкил этилган тадбир Спорт вазири ўринбосари Шаҳрилло Маҳмудовнинг кириш сўзи билан очилди. Шунингдек, маросимда Халқаро кураш институти ректори Ҳабибулла Тожиев, Ўзбекистон давлат жисмоний тарбия ва спорт университети проректори Элдор Раҳмонов, Халқаро кураш ассоциацияси бош котиби Муҳаммад Резо Нассири, соҳа мутахассислари, Миллий кураш турлари назарияси ва услубияти кафедраси профессор-ўқитувчилари ва талабалари иштирок этиб, курашнинг глобал миқёсда оммалашуви, мураббийлар тайёрлаш тизимини такомиллаштириш ва илмий тадқиқотларни ривожлантириш масалалари юзасидан ўз фикр-мулоҳазаларини билдиришди.

Анжуманда спорт соҳасининг етакчи олимлари билан бир қаторда дунёнинг 15 дан ортиқ давлатидан ташриф буюрган 30 нафардан зиёд халқаро мутахассислар  иштирок этмоқда ва улар орасида кураш мураббийлари учун ташкил этилган “Уч ойлик онлайн курс”нинг якуний босқич қатнашчилари ҳам бор. Мазкур курс мураббийларнинг касбий салоҳиятини ошириш, халқаро стандартлар асосида билим ва кўникмаларини мустаҳкамлашга хизмат қилмоқда.

Анжуман ялпи мажлиси доирасида маҳаллий ва хорижий олимлар томонидан долзарб ва инновацион мавзуларда маърузалар тақдим этилди. Жумладан, Корея, Малта, Италия ва Хитой Тайпейи каби давлатлардан келган экспертлар курашнинг замонавий биомеханикаси, спортчиларнинг руҳий ва жисмоний ҳолатини 3Д технологиялар ёрдамида таҳлил қилиш, шунингдек, кураш педагогикасининг ижтимоий аҳамиятига оид илмий ёндашувлар ҳақида атрофлича маълумот бердилар.

Куннинг иккинчи ярмида ЎзДЖТСУ кураш залида халқаро кураш мураббийлари семинарининг амалий босқичи бошланди. Унда иштирокчилар кураш усулларининг тўғри бажарилиш техникаси бўйича халқаро кураш ассоциацияси бош котиби, IKA ўқув бўлими бошлиғи Муҳаммад Реза Нассири ҳамда халқаро экспертлар Ажмал Исақ Заи, Шуҳрат Қурбонов ва Феруз Бобомуродов томонидан ўтказилган амалий машғулотлар орқали ўз билим ва тажрибаларини янада мустаҳкамлашди. 

Таъкидлаш жоиз, мазкур халқаро илмий-амалий анжуман кураш спортини илмий асосда ривожлантириш, инновацион технологияларни амалиётга жорий этиш, шунингдек, халқаро ҳамкорликни кенгайтиришда муҳим платформа вазифасини ўтамоқда.
Айни пайтда анжуман ўз ишини шуъбаларга бўлинган ҳолда давом эттирмоқда. Унда мутахассислар томонидан кураш спортини ривожлантиришнинг турли жиҳатлари, жумладан, тайёргарлик жараёнлари, методик ёндашувлар ва замонавий технологиялар қўлланилишига оид масалалар чуқур муҳокама қилинмоқда.