"Ўзбекистонлик Ҳабиб" хақиқий Ҳабибнинг ватандоши билан жанг қилади ёхуд UAE Warriors 55 турнирида яна бир ўзбек ўғлони!

Хабарингиз бор, 22 октябрь куни Абу-Даби шаҳрида UAE Warriors лигаси 55-турнирини ўтказади ва ушбу кечанинг марказий жангида Хотамбек Бойназаров чемпионлик камари учун Озарбайжон вакили Тахир Абдуллаев билан тўқнаш келади. Шунингдек, Акбар Исломбоев ҳам октагонга кўтарилади. Sports.uz сайтига маълум бўлишича, ушбу кечада кўпчилик мухлислар томонидан "Ўзбекистонлик Ҳабиб" дея эътироф этилаётган юртдошимиз Камронбек Ортиқов хақиқий Ҳабиб Нурмагомедовнинг ватандоши Мурад Гамзатовга қарши жанг қиладиган бўлди. Дониёрбек Рўзиев ҳамда Ҳусан Мажлимов қўл остида машғулотлар олиб бораётган Камронбек Ортиқов UAE Warriors лигасида 2- жангини ўтказади. У биринчи жангида филиппинлик Нико Алжеони мағлуб этганди. Шунингдек у ONE FC турнирларида ҳам 2 бор октагонга кўтарилган ва бир ғалаба ва бир мағлубият қайд этган. Умумий кўрсаткичи 3-1 кўриниш олган. Албатта, ушбу жангда ҳамюртимизга омад тилаймиз!