Ўзбекистон ва яна 12 мамлакат Чефериннинг Жаҳон чемпионати ҳақидаги танқидига жавоб қайтарди

Бир қатор миллий футбол ассоциациялари УЕФА президенти Александер Чефериннинг кенгайтирилган Жаҳон чемпионати формати ҳақидаги танқидий фикрларига нисбатан қўшма баёнот билан чиқиш қилди.

Бен Жейкобс томонидан эълон қилинган расмий мурожаатни Кабо-Верде, Кюрасао, Ўзбекистон, Конго, Гаити, Жазоир, Тунис, Марокаш, Миср, Гана, Сенегал, ЖАР ва Кот-д’Ивуар футбол ассоциациялари имзолаган.

Баёнотда Чефериннинг баъзи Жаҳон чемпионати ўйинларини қизиқарлисиз деб атагани қаттиқ танқид қилинган.

"Биз бу фикрларни ҳурмат билан, аммо қатъий рад этамиз. Мамлакатларимиз учун Жаҳон чемпионатида аҳамиятсиз ўйин деган тушунча мавжуд эмас. Кабо-Верде, Кюрасао ва Ўзбекистон учун мундиал финал босқичига чиқиш бир неча авлодлар орзусининг ушалишидир", — дейилади мурожаатда.

Шунингдек, Конго ва Гаити каби терма жамоалар учун Жаҳон чемпионатига қайтиш миллионлаб мухлислар кутган тарихий воқеа экани таъкидланган.

Муаллифлар ҳар бир жамоа мундиалга спорт тамойиллари асосида йўл олганини эслатиб, футболнинг кучи унинг универсаллиги ва турли халқларни бирлаштира олишида эканини қайд этишган.

"Ҳар бир миллат бу ҳуқуқни майдонда қўлга киритган. Ҳар бир ўйин муҳим аҳамиятга эга", — дея хулоса қилинган баёнотда.

Маълумот учун, 2026 йилги Жаҳон чемпионати АҚШ, Мексика ва Канадада ўтказилмоқда ҳамда турнир 19 июль куни якунланади.