Ўзбекистон U-17 терма жамоаси энг кўп боксчи билан финалга етиб борди!

Тошкент мезбонлик қилаётган бокс бўйича U-15 ва U-17 ёш тоифалари ўртасидаги Осиё чемпионатида ярим финал жанглари ортда қолди. Ўсмирлар (U-17) тоифасидаги баҳсларда Ўзбекистон терма жамоасининг 16 нафар вакили (6 нафар қиз ва 10 нафар йигит) финал йўлланмасини қўлга киритди.

Шубҳасиз, бу иштирокчи давлатлар орасидаги энг юқори натижа бўлди. Бу кўрсаткич бўйича Қозоғистон терма жамоаси 11 нафар финалчи билан иккинчи ўринни эгаллаган бўлса, кучли учликни 9 нафар финалчига эга Ҳиндистон терма жамоаси якунлаб турибди.

Эслатиб ўтамиз, кичик ўсмирлар (U-15) тоифасида ҳам 21 нафар боксчимиз финал йўлланмасини қўлга киритиб, энг юқори натижани қайд этган эди.

Бугун мусобақада дам олиш куни. Эртага U-15, 15 май куни эса U-17 ёш тоифаларида финал жанглари бўлиб ўтади. Бу ҳақда МОҚ хабар бермоқда.