Ўзбекистон Суперлигаси ҳозир Европадаги бу чемпионатдан кучли

Ўтган йилнинг иккинчи ярмини “Андижон” клубида ўтказган Қозоғистон ёшлар терма жамоаси аъзоси Абинур Нуримбет мамлакатимиздаги фаолияти ҳақида қисқа интервью берди.

— Беларусь ва Ўзбекистон чемпионатларида ўйнадинг. Энди Қозоғистонда “Турон” жамоаси шарафини ҳимоя қиласан. Бу қарорга қандай келдинг?

— Оиламдагилар ва агентим билан маслаҳатлашдим. Кейин Қозоғистон чемпионатига қайтиб, ўз кучимни шу ерда синаб кўришга қарор қилди. Асосий мақсадим – Қозоғистон миллий терма жамоасига кириш.

— Қайси чемпионат кучли, Беларусникими ёки Ўзбекистонники?

— Беларусь чемпионати илгаригидек кучли эмас. Айни пайтда Ўзбекистон Суперлигаси анча рақобатбардош. Ўзбекистонда ўйнаётган хорижий ўйинчиларнинг савияси ва сифати яққол кўзга ташланади.

— Ўзбекистоннинг бошқа клубларидан таклиф бўлмадими?

— Жиддий қизиқиш бўлгани йўқ. Мен “Андижон”да кам ўйин амалиётига эга бўлдим ва шунинг учун ҳам у ерда қолмадим. Шукрки, Ўзбекистон кубогида ғолиб чиқдик. Шартномам тугаганидан кейин клуб мени ўқув-машғулот йиғинига таклиф қилди, лекин мен кетишга қарор қилдим.

Абинур “Тараз” клуби тарбияланувчиси ҳисобланади. 18 ёшида Беларусга йўл олиб, “Энергетик-БГУ” ва “Гомель” каби клубларда ўйнаб келган. Нуримбет 2024 йилнинг ёзида “Андижон” сафига қўшилди. Андижонликлар сафида жами олтита учрашувда иштирок этди.