Ўзбекистон крикет терма жамоаси халқаро мусобақаларда иштирокини бошлади

Жорий йилнинг 10-20 июнь кунлари Сингапурда крикет бўйича 2027 йилги Осиё чемпионатига саралаш ўйинлари —  "Challenger Cup" мусобақаси бўлиб  ўтади. Шу боис, 6 июнь куни бош мураббий Муртоза Чуғтой бошчилигидаги Ўзбекистон крикет миллий терма жамоаси йўлланмани қўлга киритиш мақсадида Сингапурга етиб борди.

Ўттиздан ортиқ терма жамоалар иштирокидаги саралаш ўйинларига 10 июндан старт берилган бўлиб, Ўзбекистон терма жамоаси D гуруҳидан жой олган ва илк расмий ўйинини эртага 12 июнь куни Камбоджа терма жамоасига қарши ўтказади.

Таъкидлаш жоиз, Ўзбекистон крикет федерацияси томонидан олимпия ўйинлари дастуридан ўрин олган ушбу спорт турини яқин беш йилда  кенг оммалаштириш борасидаги тинимсиз саъй-ҳаракатлар бугун ижобий натижасини кўрсатгани боис, крикет бўйича миллий терма жамоамиз илк бор халқаро расмий ўйинларида иштирокини бошлади. Шундай экан терма жамоамизга халқаро майдонда Ўзбекистон шарафини муносиб ҳимоя қилиб, Ватанимиз байроғини баланд ҳилпирашига, мадҳиямиз баралла янграшида омад ва зафарлар тилаймиз. 

Илҳом РАҲМОНОВ тайёрлади