- #Португалия
- #Ўзбекистон
- #Криштиану Роналду
- #Футбол бўйича жаҳон чемпионати
- #Колумбия
- #Элдор Шомуродов
- #Виталий Денисов
- #Аббосбек Файзуллаев
- #Абдуқодир Ҳусанов
Ўзбекистон жаҳон чемпионатида қаергача етиб боради?
- 20-декабр 2025, 00:00
- Ali Ahmadxo’jayev
- 0
- Футбол
Ўзбекистон миллий терма жамоаси собиқ ҳимоячиси Виталий Денисов футбол оламида ўзига яраша из қолдирган футболчилардан. Профессионал фаолияти давомида Россия, Украина ва Ўзбекистон клубларида тўп тепган.
Москванинг ЦСКА клуби сафида икки маротаба Россия кубоги ва бир марта УЕФА кубогини қўлга киритган. Россия пойтахтининг яна бир жамоаси – “Локомотив” таркибида мамлакат чемпиони ва икки бор кубок соҳиби бўлган.
Виталий Денисов Ўзбекистон миллий терма жамоаси сафида 72 та учрашувдан иштирок этиб, ҳимоядаги вазифаларини бажаришдан ташқари битта гол уришни ҳам уддалаган.
38 ёшли футболчи Ўзбекистон миллий терма жамоасининг 2026 йилги жаҳон чемпионатида ўйнайдиган гуруҳи ҳақида ўз фикр-мулоҳазаларини билдириб ўтди.
Маълумки, футболчиларимиз дебют мундиални “К” квартетида Колумбия ва Португалияга қарши ўйинлар билан бошлайди. Учинчи рақиб Конго Демократик Республикаси, Янги Каледония ва Ямайка терма жамоалари ўртасидаги плей-офф орқали аниқланади.
- Гуруҳ жуда жиддий. Португалия ҳақида гапириб ўтиришнинг ўзи шарт эмас, ҳаммага барчаси аён. Колумбия ҳам кучли рақиб, лекин жаҳон чемпионатида бошқачаси бўлмайди.
Менимча, гуруҳ жуда ажойиб, қуръадан мамнунман. Криштиану Роналдуга қандай қарши туриш мумкин? Мураббийлар штаби барчасини батафсил таҳлил қилади, янгича ҳеч нарсани ўйлаб топиб ўтириш шарт эмас.
Қолаверса, у ерда хавф фақат Роналдудан келиб чиқмайди. Жоау Невеш, Бруну Фернандеш, Витинья каби энг юқори савиядаги футболчилар кўп. Бизни жуда қизиқарли ўйинлар кутиб турибди.
Бир томондан, Ўзбекистон учун илк жаҳон чемпионатида юксак вазифалар у қадар муҳим эмас, деган фикрларга қўшиламан. Аммо иккинчи томондан, фақат иштирок билан чекланиб қолишни истамаймиз. Ҳеч бўлмаса гуруҳдан чиқиш керак, шунинг ўзиёқ яхши натижа бўлади.
Ҳозирча қанча мухлисларимиз у ерга бориўини билмайман, аммо АҚШда ўзбек диаспораси анча катта, шунинг учун футболчиларимиз қўллаб-қувватлашсиз қолмасдишт аниқ.
Ўзимнинг сафарим ҳақида эса ҳозирча аниқ гап айтолмайман, чипталарни топиш қийин бўлади. Бу нафақат Португалияга қарши, балки исталган ўйин учун ҳам шундай бўлади, - деди Виталий Денисов.
ФИФА таснифидаги энг нуфузли турнир ҳисобланган бу галги жаҳон чемпионатига АҚШ, Канада ва Мексика мезбонлик қилади. 48 жамоа иштирок этадиган турнир 2026 йилнинг 11 июнидан 19 июлига қадар давом этади.