Ўзбекистон билан бўладиган ўйин олдидан Роналдуга қаттиқ талаб қўйилди
- 15-май, 07:49
- Zohir Toshxo’jayev
- 0
- Футбол
Айни пайтда АҚШ, Мексика ва Канада яшил майдонлари мезбонлик қиладиган жаҳон чемпионатида иштирок этадиган жамоалар тайёргарликнинг сўнгги босқичига киришмоқда.
Мундиалда илк маротаба иштирок этадиган Ўзбекистон миллий терма жамоаси “К” гуруҳида Колумбия, Португалия ва Конго Демократик Республикаси жамоалари билан рақобатлашади.
Гуруҳ фаворити ҳисобланган Португалия миллий терма жамоаси бош мураббийи Роберто Мартинес жаҳон чемпионати олдидан етакчи футболчиси Криштиану Роналдунинг жисмоний ҳолати ва ўйини ҳақида фикр билдирди.
Мартинес Саудия Арабистони чемпионатидаги “Ан-Наср” ва “Ал-Ҳилол” (1:1) ўртасидаги марказий учрашувни кузатди. У миллий жамоанинг бир нечта футболчилари, жумладан Рубен Невеш, Жоау Феликс ва Криштиану Роналдунинг ҳаракатларини диққат билан томоша қилиб, уларни баҳолади.
- Криштиану ҳали ҳам ғалаба қозониш учун улкан иштиёққа эга ва мен унинг Саудия Арабистонига кўчиб ўтганидан кейин даражаси пасайганини кўрмаяпман. У жуда яхши ўйнамоқда ва Португалия терма жамоаси учун нақадар муҳим эканини исботлади. Барча ютуқ ва муваффақиятлардан кейин ҳам Роналду юқори даражадаги иштиёқини сақлаб қолган, - деди Роберто Мартинес.
Шу билан бирга, мураббий ўтмишдаги хизматлар автоматик равишда таркибдан жой кафолатламаслигини ҳам таъкидлади.
- Фақат ютуқларнинг ўзи терма жамоадан жой олиш учун етарли бўлмайди. Футболчи жамоага муваффақият қозонишда ёрдам бериши керак. Роналду терма жамоа сардори экани ва ажойиб натижаларга эришганига қарамай, бошқа ҳар қандай футболчи каби бир хил мажбуриятларга эга, - дея қўшимча қилди бош мураббий.
Роберто Мартинес 2026 йилги жаҳон чемпионати учун Португалия терма жамоасининг якуний таркибини 19 май куни эълон қилиши кутилмоқда. Агар Криштиану Роналду рўйхатга киритилса, бу унинг фаолиятидаги олтинчи жаҳон чемпионати бўлади.
Португалия миллий терма жамоаси жаҳон чемпионатидаги иштирокини АҚШ вақти билан 17 июнь куни Конго Демократик Республикаси миллий терма жамоасига қарши ўйин билан бошлайди. Шунингдек, гуруҳ босқичида Ўзбекистон ва Колумбия футболчиларига қарши ҳам баҳс олиб боради.
Футбол экспертлари португалиялик футболчиларнинг салоҳиятини юқори баҳолаб, жаҳон кубогига асосий даъвогарлар сафига қўшмоқда. 41 ёшли Криштиану Роналду фаолияти давомида жаҳон чемпионатидан бошқа барча нуфузли совринларни қўлга киритиб бўлган.
Роналду халқаро миқёсда Португалия терма жамоаси учун 226 та учрашувда майдонга тушиб, рақиблар дарвозасини 143 маротаба ишғол қилган. Ҳар икки кўрсаткич ҳам жаҳон рекорди ҳисобланади.