Ўзбек легионерининг кутилмаган трансферига изоҳ берилди

УЕФА таркибига кирувчи Қозоғистон чемпионатида қисқа танаффусдан кейин яна ўзбек футболи вакили пайдо бўлди. Маълумки, қўшни мамлакат Премьер-лигасининг биринчи даврасида ҳамюртларимиздан Шаҳбоз Умаров, Беҳруз Асқаров, Хуршид Мухторов ва Одил Абдумажидов “Турон” жамоаси шарафини ҳимоя қилган эди.

Бироқ ярим мавсумдан кейин Туркистон вилояти жамоаси бор эътиборни маҳаллий ўйинчиларга қаратишга қарор қилди ва жамоадаги деярли барча легионерлар билан шартномани бекор қилди. Шу қаторда тўрт ўзбек футболчиси ҳам Қозоғистон Премьер-лигасини тарк этди.

Қисқа танаффусдан кейин қўшни мамлакатда ўйнаган футболчиларимиздан Шаҳбоз Умаров яна ортга қайтишига тўғри келди. Ёзги трансферлар давомида “Ордабаси” илгари жамоада тўп тепиб, чимкентликларнинг чемпион бўлишига катта ҳисса қўшган Умаровни клубга қайтариш бўйича музокара ўтказаётгани ҳақида хабарлар тарқатилган эди.

Кутилмаганда, 26 ёшли ҳужумкор футболчи “Тобол” сафига қўшилди.

“Тобол” директори Санжар Сейтказинов клубнинг кутилмаган трансфер бўйича қарорини қуйидагича изоҳлади.

-  Умаровнинг трансфери таркибда жароҳатланганларнинг кўпайиб кетгани билан боғлиқ. Шаҳбоз билан музокаралар тез, осон ва қисқа бўлди, - деди Сайтказинов. 

Таъкидлаш жоизки, “Тобол” жорий мавсумда чемпионлик ва Европа Чемпионлар лигаси йўлланмаси учун кураш олиб бормоқда. Кустанайликлар ҳозирча чемпионатнинг йигирмата учрашувидан 13 тасида зафар қучган, бештасида дуранг қайд этган ва икки марта мағлубиятга учраган.

“Тобол” жами 44 очко билан мусобақа жадвалида иккинчи ўринда бормоқда. Пешқадамга айланган “Астана” 46 очко жамғарган. Бироқ бу жамоа “Тобол”га нисбатан битта ўйин кўп ўтказган. Чемпионликка даъвогар яна бир жамоа – “Қайрат” йигирмата баҳсда 43 очко тўплади.

Шаҳбоз Умаров бу мавсум ўз фаолияти давомида иккинчи бор Қозоғистон чемпиони бўлиш имконига эга. Биринчи марта у 2023 йили “Ордабаси” сафида олтин медалга эга чиққан эди.

Умуман олганда, Шаҳбоз Умаров ўзи ўйнаган аксарият жамоаларда турли совринларни қўлга киритиб келмоқда. Хусусан, “Пахтакор” тарбияланувчиси профессионал фаолиятини Олмалиқнинг ОТМК жамоасида бошлаган ва 2018 йилги мавсумда Ўзбекистон кубоги соҳиби бўлди.

Шаҳбознинг легионер сифатида УЕФА таркибига кирувчи Беларусь ва Қозоғистон футболидаги фаолияти анча муваффақиятли чиқди. 2020 йилнинг бошида Беларуснинг “Энергетик-БГУ” жамоасига қўшилган ҳужумкор футболчимиз ярим мавсумдан кейин ушбу мамлакатнинг энг қудратли клубларидан БАТЭга кўчиб ўтди.

Борисовликлар жамоасининг энг маҳоратли ва энг қиммат активига айланган Умаров ушбу жамоа сафида Беларусь кубоги мусобақада зафар қучди. Шаҳбознинг БАТЭдаги фаолияти яхши давом этаётган эди. Аммо 2022 йилнинг бошида БАТЭнинг янги бош мураббийи ва жамоа етакчиси Шаҳбоз Умаров ўртасида машғулотларнинг бирида жиддий келишмовчилик келиб чиқди.

Беларусь футболини ёритишга ихтисослашган манбалар ўша пайтдаги зиддият илгари профессионал футболчилар билан ишламаган мураббийнинг ўзбек легионерини ҳақорат қилганидан бошланганини ёзган эди. Бунинг оқибатида мураббийлар штаби Умаровни ярим мавсум давомида бирор маротаба ҳам майдонга туширмади.

Шаҳбоз ўйин амалиётига эга бўлиш учун Қозоғистоннинг “Ордабаси” клубига ижарага ўтишга мажбур бўлди. Истеъдодли ўйинчи синмайди, деганларидек, Чимкент шаҳри клубида Умаровнинг ишлари юришиб кетди. Ярим мавсумда жамоа етакчиларидан бирига айланган ҳамюртимиз Қозоғистон кубоги соҳиби бўлди.

2023 йилги мавсумда эса, Шаҳбоз Умаров яна бир легионеримиз Бобур Абдухолиқов билан бирга “Ордабаси”ни клуб тарихида илк бор Қозоғистон чемпиони бўлишига ҳисса қўшди.

Эслатиб ўтамиз, Шаҳбоз Умаров Ўзбекистон миллий терма жамоасига номзод футболчилардан ҳисобланарди. У халқаро майдонда беш бор бош жамоа шарафини ҳимоя қилган ва 2024 йилги Осиё кубогида иштирок этганди.

Шомуродов ва Файзуллаев “Башакшеҳир”даги жиддий ўзгаришларга сабаб бўлмоқда

“CAFA Nations Cup 2025”: Ҳусановнинг бир ўзи Эрон терма жамоасидан қиммат туради!

Ҳусановни Чемпионлар лигасида катта тарихий воқеа кутмоқда

Ҳусановнинг рекорди жойида қолди!

Файзуллаев узоқ танаффус олишга мажбур бўлди

Ҳусанов бор, бу юлдуз керак эмас!

Гвардиола Ҳусанов бўйича қарорини айтди

Гвардиола, Ҳусановдан воз кечиб, катта хато қилдинг!