Ўзбек легионерига қўполлик қилган футболчи уч ўйинга ҳайдалди

Қозоғистон Премьер-лигасида иштирок этаётган “Жетису” футболчиси Диас Оринбасар уч ўйинлик дисквалификацияни ўташига тўғри келади.

Чемпионатнинг еттинчи турида “Жетису” Туркистон вилоятида “Турон” жамоаси меҳмони бўлганди. Ҳисоб очилмаган бу учрашувда меҳмонларнинг 22 ёшли ярим ҳимоячиси Диас Оринбасар “Турон”нинг ўзбекистонлик ҳимоячиси Одилбек Абдумажидовга нисбатан қўпол ўйнагани боис майдондан ҳайдалган.

Премьер-лига тартиб-интизом қўмитаси қарорига кўра, Диас Оринбасарнинг қўполлиги уч ўйинлик дисквалификация билан жазоланди.

“Жетису” футболчиси саккизинчи турдан ўрин олган “Окжетпес”га қарши учрашувга жалб қилинмади. Шунингдек, у 17 майга белгиланган “Атирау” майдонидаги кейинги  беллашувни ҳам ўтказиб юборади. Мураббийлар штаби 24 майда бўладиган “Актобе”га қарши тўқнашувда ҳам бу ярим ҳимоячи хизматидан фойдалана олмайди.

Диас Оринбасар жамоанинг асосий таркиб ўйинчиси ҳисобланиб, бунгача олтита учрашувда иштирок этган эди.

Таъкидлаш лозимки, ўзбекистонлик футбол ишқибозлари бу мавсум Қозоғистон Премьер-лигасида “Турон”га мухлислик қилмоқда.

Чунки Туркистон вилояти жамоасида бу йил тўрт нафар ўзбек футболчиси тўп тепяпти. Уларнинг бари асосий таркиб ўйинчиси ҳисобланади.

Хусусан, Диас Оринбасар дисквалификациясига сабабчи бўлган 23 ёшли ҳимоячи Одилбек Абдумажидов Қозоғистон чемпионати ва мамлакат кубогида тўққизта учрашувни ҳам бошланғич таркибда бошлади.

Қозоғистон чемпиони ва мамлакат кубоги соҳиби ҳисобланган 26 ёшли ҳужумкор футболчи Шаҳбоз Умаров ҳисобида олтита ўйинда битта гол ва учта ассист бор.

31 ёшли универсал ҳимоячи Хуршид Мухторов Премьер-лига ва кубок ўйинларида тўққиз маротаба майдонга тушиб, ҳимоядаги вазифаларини уддалашдан ташқари, чемпионатда ўз ҳисобига битта гол ҳам ёздириб қўйди.

Ниҳоят, “Пахтакор”дан ижарага олинган иқтидорли ҳужумкор футболчи Беҳруз Асқаров ҳам легионер мақомига жуда тез кўникди. Креатив ҳаракатлари билан ажралиб турадиган легионеримиз “Турон” сафида тўққизта учрашувда қатнашиб, битта гол ва иккита ассист муаллифи бўлди.

Ҳусанов жамоасидан “ёндирадиган” хабар!

Раньери ва Шомуродов А Серияни даҳшатга солмоқда

Шомуродов “Рома”нинг “топ-5”даги тарихий рекордини таъминлаб берди!

Ҳусанов жамоасига яхши хабарлар кела бошлади!