Ўйин вақтида камерага тушиб қолган парагвайлик гўзал моделлик агентлигидан таклиф олди

Жаҳон чемпионати вақтида Парагвай терма жамоаси мухлисаси Наиэль Агилера Туркия – Парагвай (0:1) учрашуви давомида трибунада камера объективига тушиб қолди.

Ушбу кадрлар ижтимоий тармоқларда кенг тарқалгач, Агилера машҳурликка эришди ва моделлик агентлигидан ҳамкорлик таклифини олди.

Бундан ташқари, унга сериалда суратга тушиш бўйича ҳам таклиф келиб тушган. Агилера Парагвай телевидениесида берган интервьюсида келажакда Парагвайни «Коинот маликаси» танловида намойиш этишни исташини айтди.

Шунингдек, у немис, инглиз ва испан тилларида эркин гаплаша олишини, университетда клиник психология йўналишида биринчи курс талабаси эканини маълум қилди. Иккинчи курсда эса ҳайвонларни ҳимоя қилиш билан шуғулланувчи ташкилот тузишни режалаштираётганини айтди.

Мухлислар Агилерани омад рамзи деб ҳисоблашмоқда — уларнинг фикрича, у трибунада бўлса, Парагвай албатта ғалаба қозонади. Парагвай Жаҳон чемпионатида D гуруҳида учинчи ўринни эгаллаб плей-оффга чиқди ва 1/16 финалда Германияни сенсацион тарзда пенальтилар сериясида (1:1, пенальтилар — 4:3) мусобақадан чиқариб юборди.