Ўттиз уч ёшли боксчи мияга қон қуйилиши оқибатида вафот этди

Пуэрто-Риколик собиқ профессионал боксчи Причард Колон 33 ёшида бу дунёни тарк этди. Унинг ўлими ҳақида спортчининг отаси Ричард Колон ижтимоий тармоқларда маълум қилди.

Причард Колон боксда катта истиқболга эга бўлган спортчилардан бири эди. У профессионал фаолияти давомида 16 та баҳс ўтказиб, барчасида ғалаба қозонган ва 13 тасини нокаут билан якунлаган. Бироқ 2015 йил октябридаги жанги унинг ҳаётини бутунлай ўзгартириб юборди.

Ўша куни Колон АҚШнинг Виржиния штатида Террел Уильямсга қарши рингга кўтарилди. 10 раундга мўлжалланган баҳснинг дастлабки қисмида Колон яхши ҳаракат қилди, аммо жанг давомида унинг бошининг орқа қисмига бир неча бор тақиқланган зарбалар берилди.

Боксда бошнинг орқа қисмига зарба бериш "rabbit punch" деб аталади ва қоидабузарлик ҳисобланади. 7-раундда Уильямс Колоннинг боши орқасига зарба бергани учун бир очкосидан маҳрум қилинган. Колон эса жанг давомида ҳакамга бошининг орқа қисмига зарбалар берилаётганидан бир неча бор шикоят қилган.

Бундан ташқари, 5 раундда Колон рақибининг бел паст қисмига зарба бергани учун икки очкосидан маҳрум қилинди.

9-раундда эса Уильямс Колонни икки марта нокдаунга учратди. Раунд охирида Колон жуда ҳолсиз ва боши айланган ҳолда кўринарди.

Шундан кейин эса бокс тарихидаги энг ғайриоддий ҳолатлардан бири содир бўлди.

9-раунддан сўнг Колоннинг бурчагидагилар жанг тугаган деб ўйлаб, унинг қўлқопларини еча бошлашди. Аслида эса 10-раунд ҳали олдинда эди. Улар хатони англаб, қўлқопларни қайта кийдиришга уринган бўлса-да, жуда кўп вақт ўтиб кетган эди. Натижада ҳакам Колонни дисквалификация қилди ва расмий натижа Террел Уильямс ғолиб деб топилди.

Бироқ энг оғир воқеалар жангдан кейин бошланди. Колон кийиниш хонасида боши айланиб, қайт қилди. Кейин уни шифохонага олиб боришди. Шифокорлар унинг миясида оғир қон кетишини аниқлади ва зудлик билан операция ўтказилди.

Колон шундан кейин 221 кун давомида комада қолди. У комадан чиққанидан кейин ҳам мия жароҳати оқибатларидан тўлиқ тиклана олмади ва умрининг қолган қисмида доимий парваришга муҳтож бўлди.

Спортчининг оиласи йиллар давомида уни парвариш қилди. Унинг онаси ва отаси Колоннинг ҳаётини енгиллаштириш, реабилитацияси ва даволаниши учун доим ёнида бўлишди.

Орадан қарийб 11 йил ўтиб, 2026 йил 13 август куни Причард Колон 33 ёшида вафот этди.