Отабек Холматовнинг кейинги рақиби маълум

Ярим енгил вазн тоифасида WBA камари учун собиқ даъвогар, ўзбекистонлик профессионал боксчи Отабек Холматовнинг навбатдаги жанги тасдиқланди.

Аввал маълум қилганимиздек, Холматов 5 апрель куни Қозоғистоннинг Астана шаҳрида Top Rank промоутерлик компанияси томонидан ташкил этиладиган бокс оқшоми доирасида филиппинлик боксчи Жейсон Канойга қарши рингга кўтарилади.

Ушбу жанг ташкилотчилар томонидан расман тасдиқланди. Ҳамюртимиз ҳозирда мазкур жангига АҚШнинг Калифорния штати, Индио шаҳрида Бектемир Мелиқўзиев, Муроджон Аҳмадалиев каби ўзбекистонлик чарм қўлқоп усталари билан бирга тайёргарлик кўрмоқда.

Маълумот учун, Отабек Холматов фаолияти давомида 13 та жанг ўтказиб, 12 ғалаба ва 1 мағлубият қайд этган. У сўнгги жангини ўтган йилнинг март ойида вакант бўлиб турган WBA камари учун Раймонд Фордга қарши ўтказиб, 12-раунд якунланишига бир неча сониягина қолган бир паллада аламли тарзда имкониятни бой берганди.

Таққослаш учун, Каной ҳисобида 30 ғалаба, 12 мағлубият ва 2 та дуранг бор. 

Бу ҳақда Ўзбекистон профессионал бокс федерацияси хабар бермоқда.