Отабек Шукуров: "Биринчи бўлимда жудаям ёмон ўйнадик"

"FIFA Series турнири доирасида Ўзбекистон миллий терма жамоаси Габонга қарши баҳс олиб бориб, 3:1 ҳисобида ғалаба қозонди. Ушбу баҳсдан сўнг "оқ бўрилар" аъзоси Отабек Шукуров ўз фикрларини билдириб ўтди.

"Бисмиллаҳ, аввало ассалому алайкум. Яхши ўйин ўтказмадик. Лекин, хурсанд қиладиган жиҳати — ғалаба қозонганимиз. Балки, бу жамоанинг тайёргарлигига боғлиқ нарсадир. Иншааллоҳ кейинги ўйинга бундан ҳам жиддийроқ тайёргарлик кўриб, муносиб ўйнашга ҳаракат қиламиз. Барибир, анча вақтдан кейин жамоа йиғилди, бу ҳам даражага озроқ таъсир қилади. Аммо энг хурсанд қиладиган жиҳати — ғалаба қозондик."

Габон терма жамоаси айнан қайси жиҳатда яхши ўйин кўрсатди деб айта оласиз?

"Энди, африкаликлар кўпроқ жисмоний ҳолати яхши, яна кўпроқ агрессив ўйнайди, шунинг учун озроқ қийин бўлди. Юқорида айтганимдек, яхши ўйин ўтказмадик. Лекин, Алҳамдулиллаҳ. Ёмон нарсадан ҳам яхшисини қидирсангиз, шу ғалаба бўлади."

Бугун жамоага ким етишмади?

"Жамоага кимдир етишмади дейолмайман. Ҳар бир футболчининг ўрни бор, жароҳатдаги ўйинчилар кўп, Эрондаги ҳолатдан кейин кўп ўйинчилар ўйин амалиётисиз қолди. Бу жиҳат барибир таъсир қилади. Ўйлайманки, мураббий бу жиҳатни ҳам инобатга оляпти, аста-секин яхшиланамиз."

Отабек ака, адашмасам, ўйиннинг 17 ёки 18-дақиқасида Каннаваро (мураббий) сизни олдига чақириб, нима кўрсатмалар берди?

"Кўрсатмада, ўйиндан олдин тайёргарлик кўрган жиҳатларимизни қилолмаганимиз ва Остон Ўрунов, қолганлар ҳам нотўғри прессингга чиқаётганимиз, ҳамма биргаликда ҳаракат қилмаётганини уқтиришга ҳаракат қилди. Чунки ўйиндан олдин кўп ишлаган эдик. Шу кўзлаган нарсаларимизни мураббийлар айтганидек қилолмадик. Прессингда ҳам, прессингдан чиқиб кетгандан кейин ҳам. Ўша жиҳатлар бўйича кўрсатма берилди. Биринчи бўлимда жудаям ёмон ўйнадик. Лекин иккинчи бўлимда яхшиланишга ҳаракат қилдик. Ишонамизки, Иншааллоҳ эртадан кейин бўлиб ўтадиган Венесуэлага қарши ўйинда янада чиройли футбол кўрсатамиз", — деди футболчи.