Осиё чемпионати вакилларимиз учун муваффақиятли бошланди

Хитойнинг Нанчанг шаҳрида байдарка ва каноэда эшкак эшиш бўйича Осиё чемпионати бошланди. Унда қитъанинг 20 давлатидан 200 нафардан ортиқ спортчи иштирок этмоқда.

Мусобақада Ўзбекистон терма жамоасининг 16 нафар аъзоси ҳам ўз имкониятларини синовдан ўтказмоқда.

Чемпионатнинг илк кунида ўзбекистонлик спортчилар бир нечта йўналишда совринли ўринларни эгаллашга муваффақ бўлишди. 

Жумладан, C-2 йўналишида 1000 метр масофага бўлиб ўтган мусобақада Муҳаммадали Мирисманов ва Диёрбек Маматқулов тандеми кумуш медалга сазовор бўлди. Шунингдек, 500 метр масофага ўтказилган баҳсларда Камолиддин Раҳматуллаев ҳамда Азимжон Сотиболдиев бронза медалини қўлга киритди.

К-1 йўналишида эса Александр Зарубин 1000 метр масофадаги пойгани учинчи ўринда якунлаб, терма жамоамиз ҳисобига яна бир бронза медалини қўшди.

Эслатиб ўтамиз, чемпионат давомида спортчилар К-1, К-2, К-4, C-1, C-2 ҳамда аралаш йўналишларда 200, 500 ва 1000 метр масофаларда Осиё чемпионлиги учун баҳс олиб боришмоқда.