Ўша куни ундан энг яхшисини тополмасдик ёхуд Суперлигада 10-турнинг қаҳрамонлари

Суперлиганинг 10-туридан кейин нима гап? 30 майдан 2 июнга қадар бўлиб ўтган учрашувлар мобайнида мухлис ва мутахассисларнинг алоҳида эътирофига сазовор бўлган ва табиийки, энг яхшиси деб аталган футболчиларга тўхталамиз.

“Динамо” – “Қизилқум” – 2:0. Энг яхши футболчи: Анвар Хожимирзаев

Вадим Абрамов жамоаси ушбу турда ишончли ўйин кўрсатиб, ҳақли равишда уч очкони қўлга киритди. Бу йил “Динамо”да дебютини ўтказаётган Анвар Хожимирзаев самарқандликларнинг ишончли футболчиларидан бирига айланиб улгурди. Ҳар бир учрашувда у фаол ўйин кўрсатмоқда. “Қизилқум”га қарши баҳсда Анвар пенальтидан гол урди. Бутун ўйин мобайнида майдонда ажралиб турди.

“Навбаҳор” – “Олимпик” – 0:0. Энг яхши футболчи: Хамидилло Абдунабиев

Наманганликлар жуда қимматли икки очкосидан маҳрум бўлди. Бунга “Олимпик” дарвозабони Хамидилло Абдунабиев сабабчи. Шу куни у аъло даражада ўйин намойиш қилди ва мезбонларнинг кўплаб хавфли зарбаларини ўзининг ажойиб сейвлари билан бартараф қилди. Аслида “Навбаҳор” ғалабага лойиқ ўйин намойиш этди. Бироқ “Олимпик” посбони мезбонларнинг ғалаба қозонишига йўл қўймади. Дарҳақиқат, Намангандаги стадионда ўша куни Абдунабиевдан энг яхшисини тополмасдик.

“Сурхон” – “Сўғдиёна” – 1:0. Энг яхши футболчи: Владимир Йовович

Бу баҳсда “Сурхон” “Сўғдиёна”ни ягона гол эвазига енгди. Баҳснинг энг яхши футболчиси эса ғолиб жамоадан эмас, балки мағлуб жамоадан бўлди. “Сўғдиёна”нинг черногориялик ярим ҳимоячиси Владимир Йовович ҳақли равишда энг яхшиси бўлди. У ўртада ҳукмронлигини кўрсатди. “Сўғдиёна”нинг “мотор”ига айланиб боряпти. Аммо унинг бир ўзига ҳам осон эмас. Шунга қарамай, бу легионер ўз вазифасини яхши уддалади.

ОКМК – “Металлург” – 1:0. Энг яхши футболчи: Хуршид Ғиёсов

Миржалол Қосимов жамоаси дербида муҳим ғалабани қўлга киритди. Аллақачон ОКМКнинг асосий етакчиларидан бирига айланган Хуршид Ғиёсов бу сафар ҳам ўзини кўрсатди. Гарчи гол урмаган бўлса-да, “Металлург”га қарши яна дадил ўйин кўрсатди ва рақибларига бошоғриқ бўла олди.

“Бунёдкор” – “Нефтчи” – 0:3. Энг яхши футболчи: Хусайн Норчаев

“Нефтчи”нинг “Бунёдкор”га қарши ўйинида Хусайн Норчаев ўзини кўрсатди. Ниҳоят, у фарғоналиклар сафида жорий чемпионатдаги дебют голини урди. Аслида яна бир голда ҳам ўзи иштирок этди ва зарбаси рикошет ҳолатида дарвозадан жой эгаллади. Шунингдек, яна бир голга пас узатди. Хуллас, барча голларда Норчаев бор. Рақибга катта муаммолар туғдирди.

“Андижон” – “Пахтакор” – 1:3. Энг яхши футболчи: Достон Ҳамдамов

“Пахтакор” футболчиси Достон Ҳамдамов меҳмонда “Андижон”га қарши учрашувнинг энг яхшиси деб топилди. Дарҳақиқат, гол урди ва голли пасни узатди. Бундан ташқари, майдонда фаоллиги билан жамоасининг ғалабасига муносиб ҳиссасини қўшди.

“Насаф” – “Локомотив” – 3:0. Энг яхши футболчи: Бобур Абдухолиқов

Ваниҳоят Бобур Абдуҳолиқов “Насаф” сафида бу йил Суперлигадаги голлари ҳисобини очди. У нафақат очди, балки бир уринишдаёқ хет-трик қайд этди. Шу пайтгача голсиз серияси давом этаётган ҳужумчи бор аламини “Локомотив” билан баҳсда олди, дейиш мумкин. Унинг бир ўзи учрашув тақдирини ҳал қилди ва шубҳасиз энг яхши ўйинчи номи фақат унга тегишли.

Шуҳратбек Жўраев.