Ўзбекистонлик теннисчи жаҳоннинг энг кучли ракетка устаси билан тўқнаш келади
- 4-сентябр, 06:06
- Zohir Toshxo’jayev
- 0
- Теннис
Ўзбекистон Теннис федерацияси матбуот хизмати мамлакат номидан иштирок этаётган Камилла Рахимова (WTA рейтингида 92-ўрин) ва жаҳон рейтинги етакчиси Арина Соболенко ўртасидаги US Open-2026 турнири учинчи босқич баҳси арафасида расмий баёнот эълон қилди.
«Камилла Рахимовадан Ўзбекистон мустақиллигининг 35 йиллигига тарихий туҳфа!
Юртимиз биринчи ракеткаси US Open турнирининг учинчи босқичига йўл олди ва сўнгги 15 йил ичида бу босқичгача етиб келган илк ўзбекистонлик теннисчига айланди.
Камилла шу тариқа Ўзбекистон теннис тарихида US Open якка разряд беллашувларида учинчи босқичга чиққан иккинчи спортчи бўлди. Бундан аввал, 2011 йилда бу натижага Акгул Аманмурадова эришган эди.
Эндиликда Рахимовани жаҳоннинг биринчи ракеткаси, US Open амалдаги икки карра чемпиони Арина Соболенкога қарши жуда муҳим ўйин кутмоқда.
Камилла Рахимова ва Арина Соболенко ўртасидаги учрашув 4 сентябрь куни ўтказилади. Беллашув бошланиш вақти қўшимча равишда маълум қилинади.
Бу натижа барча мухлислар учун ҳақиқий тарихий совға бўлди», — дея таъкидланади Федерациянинг Instagram саҳифасида.
Эслатиб ўтамиз, US Open-2026 турнирининг иккинчи босқичида Рахимова испаниялик Оксана Селехметевани (WTA рейтингида 93-ўрин) 6:3, 6:0 ҳисобида мағлуб этди. Арина Соболенко эса россиялик Полина Яценкони (WTA рейтингида 160-ўрин) 6:1, 6:1 ҳисобида йирик мағлубиятга учратди.