Ўзбек футболчисига Европа клубида катта талаб қўйилди

Сербия чемпионатида иштирок этаётган “Радник” клуби бош мураббийи Зоран Рендулич жамоага қўшилган ўзбекистонлик легионер Отабек Шукуровдан нималарни кутаётганини анча батафсил тушунтирди.

42 ёшли Рендулич қарийб уч йил мамлакатнинг энг машҳур клуби “Црвена Звезда” мураббийлар штабида ишлаган. У “Радник”ни мавсум бошланишига икки ҳафта қолганида қабул қилиб олган ва бу унинг шу даражадаги биринчи мустақил иши ҳисобланади.

Мураббий Mozzart Sport нашрига берган интервьюсида биринчи навбатда янги футболчининг тажрибасини алоҳида таъкидлаб, Отабекнинг терма жамоа сафида 90 дан ортиқ учрашув ўтказгани, сардорлик мақоми ва Ўзбекистоннинг жаҳон чемпионатидаги учта баҳсининг барчасида иштирок этганини алоҳида тилга олди.

Рендулич “Радник” даражасидаги клуб учун бундай резюмега эга футболчининг келиши жамоанинг ўсишидан далолат беришини айтди.

Бироқ энг муҳими – сербиялик мураббий Отабек Шукуровнинг жамоадаги вазифасини аниқ тасвирлаб берди.

- Бу айнан бизга керак бўлган футболчи профили – улкан тажрибага эга ярим ҳимоячи, - деди Зоран Рендулич.

Экспертларнинг таъкидлашича, Сурдулицадаги жамоада Отабекни фақат ҳимоявий вазифани бажарадиган таянч ярим ҳимоячи сифатида кўришмаяпти. Ундан жарима майдонлари орасида ҳаракатланиш, тўп билан ишлаш, ҳужумларни ривожлантириш ва шу билан бирга тўп йўқотилган пайтда жамоа мувозанатини сақлаш қобилияти кутилмоқда.

“Радник” учун бу муҳим жиҳат. Рендулич жамоаси анча серҳаракат футбол ўйнайди, ҳужумга тез ўтишга ва тўпсиз ҳолатда кўп ҳаракат қилишга интилади.

Мураббий айрим учрашувларда футболчилар биринчи бўлимда ҳаддан ташқари кўп куч сарфлаб, кейинчалик жисмоний жиҳатдан пасайиб қолганини ҳам тан олган. Ўйин суръатини бошқара оладиган тажрибали марказий ярим ҳимоячи бундай вазиятда юқори даражада фойдали бўлиши мумкин.

Яна бир жиҳат бор. Рендулич “Радник” анча ёш жамоа эканини яширмайди. Кўплаб футболчилар ҳали юқорироқ даражага чиқишга ҳаракат қилмоқда ва клубга баъзи пайтларда тажриба етишмаяпти.

Мураббийнинг сўзларига кўра, жиддий тажрибага эга футболчи, аслида, фақат Александр Пейович эди. Шу маънода, Шукуров янги жамоадошларининг аксариятидан кескин ажралиб туради.

Шунга қарамай, Шукуров учун марказий ярим ҳимояда кафолатланган бўш жой йўқ. Рендулич одатда Отабекнинг позициясида Милош Попович, Александр Пейович ва Мартин Новаковични майдонга туширади. Бу учлик аввалги турларда ҳам турли комбинацияларда ярим ҳимоя марказини шакллантирган.

Энг мустаҳкам мавқе, эҳтимол, Поповичда. 22 ёшли ярим ҳимоячи “Радник” сардори ва ихтисослашган таянч ярим ҳимоячи ҳисобланади. У ҳимоя олдидаги мувозанат учун жавоб беради ва ёшига қарамай, аллақачон жамоанинг асосий футболчиларидан бирига айланган.

Новакович эса кўпроқ ҳужумкор вазифаларни бажаради. У юқорироқ позицияда ҳаракат қилади ва жамоага ижодкорлик қўшади – мавсумда унинг ҳисобига икки гол ва учта голли узатма бор. Шу сабабли уни Шукуров билан тўғридан-тўғри таққослаш тўғри эмас.

Ўзбекистонлик футболчининг энг аниқ рақобатчиси 35 ёшли Александр Пейович бўлиши мумкин. У ҳам марказий ва таянч зоналарда ҳаракат қилади ҳамда Шукуров келгунига қадар мунтазам равишда асосий таркибда майдонга тушган.

Шукуров “Радник” сафида ҳали расмий ўйин ўтказгани йўқ. Шунинг учун Рендуличнинг якуний танлови кейинроқ маълум бўлади. Отабек эса, рақобатдардош ўйинчи сифатида ҳар қандай жамоада ўз ўрнини топа олишига ишонамиз.

Ҳусанов кутилмаган хушхабар олди!

Ўзбекистон терма жамоасининг ҳақиқий кучига баҳо беришди

“Андижон” футболчиси Европадан машҳур клуб танлади!

“Трансфер бомбаси”: Европанинг 100 йиллик клуби нега ўзбек футболчисини олди?

ФИФА мундиалда Ўзбекистонга қарши ўйнаган терма жамоага ён босгани ошкор бўлди