"Ньюкасл" Луис Суарес учун 80 миллион евро тўлашга тайёр

Лиссабоннинг "Спортинг" клуби ҳужумчиси Луис Суарес яқин орада Португалияни тарк этиб, Англияга йўл олиши мумкин.

"Record" нашри маълумотига кўра, 28 ёшли колумбиялик форвардга "Ньюкасл" жиддий қизиқиш билдирмоқда.

Манбага кўра, футболчининг "Спортинг" билан тузган шартномасида 80 миллион еврога тенг товон пули белгиланган. Унинг амалдаги битими 2030 йил июнь ойи охирига қадар мўлжалланган.

Жорий Португалия чемпионати мавсумида Суарес 30 та учрашувда майдонга тушиб, 26 та гол урди. Уларнинг учтаси пенальтидан киритилган. Шунингдек, ҳужумчи ўз ҳисобига 6 та голли узатмани ҳам ёздириб қўйган.

Бундан ташқари, колумбиялик футболчи мавсум давомида 6 марта сариқ карточка олган.